Mańǵystaýda kommýnaldyq ınfraqurylymdy qysqa daıyndaý jumystary áli aıaqtalmaǵan
AQTAÝ. KAZINFORM – Mańǵystaýda kommýnaldyq ınfraqurylymdy qysqy kezeńge daıyndaý jumystary áli aıaqtalǵan joq. Óńirde jylý jáne elektr jelilerin jóndeý áli jalǵasyp jatyr. Bul maqsatqa 55 mlrd teńgeden astam qarjy qarastyrylǵan. Bul týraly Úkimet otyrysynda Mańǵystaý oblysynyń ákimi Nurdáýlet Qılybaı málimdedi.
Óńirdegi bilim berý, densaýlyq saqtaý jáne áleýmettik sala nysandarynyń jylytý maýsymyna daıyndyǵy tolyq aıaqtalǵan. Qazir 321 bilim berý, 105 densaýlyq saqtaý jáne 115 áleýmettik sala nysany qysqy kezeńge daıyn. Turǵyn úı qorynyń daıyndyǵy 97%.
Aldaǵy jylytý maýsymynda negizgi júkteme Aqtaýdyń energetıkalyq ınfraqurylymyna túsedi. «MAEK» JShS-niń №1 jáne №2 jylý elektr ortalyqtaryndaǵy úsh týrbına men tórt qazandyq agregatyn kúrdeli jóndeýge 2 mlrd teńge baǵyttalǵan. Qazir úsh qazandyq agregatyndaǵy jóndeý jumystary aıaqtalǵan. Taǵy bir qazandyq agregaty men eki týrbınada jumystar jalǵasyp jatyr. Bir týrbınanyń jóndeýi aıaqtalýǵa jaqyn.
Sonymen qatar óńirdegi elektr jáne jylý jelilerin jańartýǵa 538 mln teńge baǵyttaldy. Al jylý jelilerin jóndeý jumystary jospardan qalyp keledi. Bıyl 11,4 shaqyrym jelini jóndeý josparlansa, onyń 7,2 shaqyrymy nemese 64%-y ǵana aıaqtalǵan.
2026 jylǵa arnalǵan Ulttyq joba aıasynda óńirde jalpy quny 45,3 mlrd teńge bolatyn bes jobany iske asyrý josparlanǵan. Sonyń ishinde Aqtaýdyń 4 jáne 5-shaǵynaýdandaryndaǵy 28,3 shaqyrym jylý jelisin rekonstrýktsııalaýǵa 26 mlrd teńge qarastyrylǵan.
Mańǵystaýda tótenshe jaǵdaılarǵa arnalǵan otyn qory jasaqtalǵan. Óńir tolyq gazdandyrylǵandyqtan, kómirge qajettilik joq. Energııa kózderinde normatıv boıynsha 25 myń tonna bolýy tıis mazýttyń avarııalyq qory 26 myń tonnaǵa jetkizilgen.
Osylaısha, áleýmettik nysandardyń jylytý maýsymyna daıyndyǵy tolyq aıaqtalǵanymen, óńirdiń negizgi kommýnaldyq ınfraqurylymyndaǵy jóndeý jumystary áli jalǵasyp jatyr.
Buǵan deıin Mańǵystaýda týrızmdi damytýǵa bólingen 117 mln teńgeni jymqyrǵan kásipker sottaldy.
