Mańǵystaýda qoqysta jatqan 50-ge jýyq ıttiń óleksesine turǵyndar shaǵymdandy
AQTAÝ. KAZINFORM – Mańǵystaýda qoqysta jatqan ıtterdiń óleksesine qatysty turǵyndar shaǵymyn bildirdi.
Áleýmettik jelide jarııa bolǵan beınejazbada úlken shuńqyrda ashyq jatqan ıttiń ólekseleri anyq baıqalady. Boljam boıynsha atalǵan jaıt Munaıly aýdanyndaǵy Batyr aýylynyń mańynda bolǵan. Mańǵystaý oblystyq aýyl sharýashylyǵy basqarmasy basshysynyń orynbasary Berdibek Marhabaev qazirgi ýaqytta máseleniń qazir tekserilip jatqanyn jetkizdi. Alaıda izdeý jumystary júrgizilgenine qaramastan ıtterdiń óleksesi tabylmaǵan.
«Oqıǵa týraly beınejazba jarııalanǵan soń basqarma mamandary izdeý jumystaryn bastady. Oblystyń Munaıly aýdanyna qarasty Batyr aýylynyń ákimdigimen sóılestik. Eldimeken mańynan ıttiń ólekseleri tabylmady. Ákimdik mamandary aýylda arnaıy joıý orny baryn atady. Budan bólek, Mańǵystaý aýdanynda bolǵany týraly boljam aıtyldy. Alaıda aýdanda da bul oqıǵa tirkelmegen. Qazir tıisti jumystar qolǵa alynyp, jaǵdaı boıynsha is-sharalar júzege asyrylady. Jurttan túsken shaǵym eskerýsiz qalmaıdy», - dedi Berdibek Marhabaev.
Osyǵan deıin Aqtaýda qańǵybas ıtterdi aýlap, keıin ólekselerdi órteý kezinde shyqqan tútinge tunshyqqan turǵyndar shaǵymdanǵan edi. Buǵan qatysty Mańǵystaý oblystyq aýyl sharýashylyǵy basqarmasynyń basshylyǵy oqıǵanyń barlyǵy tıisti normalarǵa sáıkes atqarylyp jatqanyn ataǵan bolatyn.
