Mańǵystaýda qyzmetkerlerge 26 mıllıon teńgeni zańsyz aýdarǵan mektep anyqtaldy
ASTANA. KAZINFORM – QR Qarjy mınıstrliginiń Іshki memlekettik aýdıt komıteti Joǵary aýdıtorlyq palatanyń tapsyrmasyna sáıkes Munaıly aýdanyndaǵy №6-jalpy bilim beretin mektepte aýdıtorlyq tekserý júrgizgen. Nátıjesinde qarjylyq jáne protsedýralyq sıpattaǵy birqatar buzýshylyq tabyldy.
Atap aıtqanda, jekelegen qyzmetkerlerdiń eńbekaqysy artyq tólengen. Sondaı-aq, negizsiz qosymsha aqylar men syıaqylar aýdarylǵan. Oǵan qosa, issapar tapsyrmalaryn oryndamaý jáne issapar qujattaryn durys resimdemeý faktileri tirkeldi. Osylaısha, jalpy somasy 26 mıllıon teńgege ártúrli zań buzýshylyq anyqtaldy.
Memlekettik aýdıt qorytyndysy boıynsha bıýdjet qarajatyn óteý jáne býhgalterlik esepti qalpyna keltirý jóninde sharalar qabyldaý, sondaı-aq QR zańnamasyn buzýǵa jol bergen laýazymdy tulǵalardyń jaýapkershiligin qaraý máselesi tapsyryldy.
