Mańǵystaýda qyzylsha aýrýy boıynsha epıdemıologııalyq jaǵdaı turaqsyz

AQTAÝ. KAZINFORM — Búgingi tańda Mańǵystaý oblysynda qyzylsha boıynsha epıdemıologııalyq jaǵdaı turaqsyz bolyp otyr. Bul týraly óńirlik sanıtarııalyq-epıdemıologııalyq baqylaý departamentiniń basshysy Muhtar Serbaev habarlady.

Ótken jyldyń qorytyndysy boıynsha oblysta qyzylshaǵa kúdikti 174 jaǵdaı tirkelip, onyń 81-i zerthanalyq jolmen rastalǵan. Aýrý juqtyrǵandardyń basym bóligi (81,5%) 14 jasqa deıingi balalar.

- Jyl basynan beri qyzylshaǵa kúdikti 131 jaǵdaı tirkeldi, onyń 71-i zerthanalyq túrde rastaldy. Ótken jyldyń osy kezeńimen salystyrǵanda ósim 1,6 eseni qurap otyr. Rastalǵan jaǵdaılardyń 84,5 paıyzy, ıaǵnı 60 jaǵdaıy 14 jasqa deıingi balalarǵa tıesili. Aýyrǵandardyń 69 paıyzy (49 jaǵdaı) bes jasqa deıingi balalar. Aýrý juqtyrǵandardyń 70,4 paıyzy (50 jaǵdaı) vaktsına almaǵandar, onyń ishinde ekpeden bas tartý sebepti – 66% (33 jaǵdaı), medıtsınalyq qarsy kórsetilimder boıynsha – 10% (bes jaǵdaı), vaktsına jasyna jetpegen balalar – 24% (12 jaǵdaı). Ortasha oblystyq kórsetkishten (8,64) joǵary kórsetkishter Aqtaýda – 17,39 (eki ese joǵary) jáne Túpqaraǵan aýdanynda – 10,64 (1,2 ese joǵary) tirkeldi, - deıdi Muhtar Serbaev.

Memlekettik sanıtarııalyq-epıdemıologııalyq qadaǵalaý departamenti basshysynyń aıtýynsha, qyzylshadan qorǵanýdyń jalǵyz tıimdi joly – vaktsınatsııa.

Bıyl 5 qańtardan bastap, qyzylsha boıynsha epıdemıologııalyq jaǵdaı turaqtalǵanǵa deıin, 6 aıdan - 10 aı 29 kúnge deıingi balalarǵa, sondaı-aq 18 jasqa deıingi balalarǵa qosymsha vaktsınatsııa júrgizilip jatyr. 

Buǵan deıin, Mınıstrlik qyzylsha men tumaý áli tirkelip jatqanyn, degenmen jaǵdaı baqylaýda ekenin habarlaǵan edi