Mańǵystaýda qyzdy azaptap óltirgen kúdikti 22 jylǵa sottaldy

AQTAÝ. KAZINFORM – Mańǵystaýlyq 21 jastaǵy Valerııa Shalnovany azaptap óltirip, denesin kanalǵa tastap ketken kúdiktige Mańǵystaý oblysynyń qylmystyq ister jónindegi mamandandyrylǵan aýdanaralyq soty úkim shyǵardy. 

Segiz aıǵa sozylǵan tergeýden soń Aqtaý turǵyny 22 jylǵa bas bostandyǵynan aıryldy. Endi ol jazasyn qatań rejımdegi kolonııada óteıdi. Alaıda kináli óz aıybyn moıyndamaı, marqum sýıtsıd jasady dep otyr.

Qylmystyq is boıynsha marqum Valerııanyń anasy Svetlana Shalnovanyń ólimine qatysty ádil úkim shyǵarylǵanyn aıtty. Ol isti tergeýge atsalysqan barsha janǵa alǵysyn bildirdi. 

«Ótken jyly bolǵan bul oqıǵa qabyrǵamyzdy qaıystyryp ketti. Sodan beri biz tergeýdiń qalaı aıaqtalatynyn kútýmen boldyq. Osy rette sot sýdıasy Dosetova hanymǵa, Mańǵystaý oblysy prokýrorynyń orynbasaryna, qylmystyq polıtsııanyń jedel tergeý bólimine, qorǵaýshyǵa qyzymnyń óliminiń ádil tergelip, laıyqty úkim shyǵarylǵanyna septeskeni úshin alǵysymdy jetkizgim keledi. Aıta ketetin jaıt, sot kezinde qyzymdy óltirgen kúdikti óziniń qylmysyn múldem moıyndamady. Sottyń úkimimen kelispedi. Odan bólek, qylmystyq jaýapkershilikten qashyp, qyzymnyń sýıtsıd jasaǵanyn aıtty», - dedi Svetlana Shalnova.

Onyń sózinshe, kisi ólimi qoǵamda talqylaýǵa túsken soń aıypker jazadan qutyla almaǵan.

«Sot oǵan qylmysy boıynsha laıyqty jaza kesti. Endi ol qatań rejımdegi kolonııada 22 jyl jazasyn óteıdi. Osy jaǵdaı bizdiń qaıǵymyzǵa az bolsa demeý boldy», - dedi marqumnyń anasy.

22 jylǵa sottalǵan aıyptalýshy QR qylmystyq kodeksiniń 99-babynyń 2-bóliminiń 3, 10-tarmaqshalary jáne 120-baptyń 1 bólimi boıynsha jaýapqa tartyldy. Budan bólek, qylmystyq isti tergeý kezinde kedergi keltirýge tyrysqan quqyq qorǵaý qyzmetkerleri tergeletin bolady. 

Valerııa Shalnovanyń máıiti byltyr shilde aıynyń basynda Aqtaý irgesindegi kanaldan tabylǵan bolatyn. Іzdestirý kezinde oqıǵaǵa kináli kúdikti bir kúnnen keıin tabylyp, ol qyzdyń burynǵy jigiti ekeni anyqtalǵan.