Mańǵystaýda qyrkúıekte 5 jańa mektep qoldanysqa beriledi
AQTAÝ. KAZINFORM – Birinshi qyrkúıekke deıin Mańǵystaýda jalpy syıymdylyǵy 4 800 oryndyq bes mektep qoldanysqa beriledi. Onyń ekeýi Aqtaý qalasynda, qalǵany Beki, Qyzyltóbe jáne Basqudyq aýyldarynda. Oǵan qosa, bıyl tórt mektepte 773 orynǵa eseptelgen qosymsha ǵımarattardyń qurylysy aıaqtalady.
Aqtaýda jańa mektepter 18 ben 19A shaǵyn aýdandarynda iske qosylady. Árqaısy 1 200 oryndyq bilim oshaǵynda eki aýysymda 2 500-deı bala oqıdy dep josparlanǵan.
– «A» jáne «B» blogyn qosqanda 63 oqý kabıneti bar. Odan keıin 18 qosymsha, jańaǵy muǵalimderge arnalǵan, ákimshilikke arnalǵan kabınetter bar. Zamanaýı naqyshta salynǵan. Sol sebepti basqa mektepten áldeqaıda kóp erekshelikteri bar, - deıdi №24 mekteptiń dırektory Álibek Baımuratov.
Bilim basqarmasynyń málimetinshe, bastapqyda jańa oqý jylynda 18 mektepti iske qosý josparlanǵan. Alaıda jobalardyń qujatyn jasaqtaý, memlekettik saraptamadan ótý ýaqyttary uzaqqa sozyldy. Sondyqtan qalǵan 13 mektep jyl sońyna deıin qoldanysqa berilýi tıis.
– Tórt mektep «Bilim salasyn damytý» qory esebinen salynyp jatyr. Olar osy qyrkúıek aıynda tapsyrylady. Sodan keıin 21 mekteptiń 13 mektebin 2024 jyldyń jeltoqsan aıynda tapsyrý josparlanyp otyr. Qazirgi tańda qurylys jumystarynyń 80 paıyzy oryndaldy, - deıdi oblystyq bilim basqarmasy basshysynyń orynbasary Gúlbaný Qyzylǵulova.
Oblysta úsh aýysymmen oqıtyn 15 mektep bar. Onda 4 myńǵa jýyq oqýshy bilim alýda. Mamandar 2024-2025 oqý jylynda atalǵan bilim berý uıymdary iske qosylǵanda, másele sheshiletinin jetkizdi.
