Mańǵystaýda ken ornyndaǵy tótenshe oqıǵadan keıin aýaǵa taraǵan metan shekten asyp ketti
AQTAÝ. KAZINFORM — 8 maýsym kúni Varro Operating Group JShS-ne qarasty «Tolqyn» ken ornyndaǵy № 57 uńǵymadan gaz ben sý atqylap, tótenshe jaǵdaı boldy. Saldarynan atmosferalyq aýadan metan gazynyń shekten tys kólemi anyqtalǵan.
- Mańǵystaý oblystyq ekologııa departamenti zerthanalyq-taldamalyq baqylaý bóliminiń mamandary oqıǵa ornyna bardy. Qazirgi tańda, gaz ben sý shyǵaryndysy toqtatyldy. Alaıda, monıtorıng maqsatynda atalǵan aýmaqta atmosferalyq aýaǵa aspaptyq ólshemder júrgizý kezinde metannyń shekti raýaly kontsentratsııanyń asýy tirkeldi, — dedi departament basshysy Armat Júsipqalıev.
Onyń aıtýynsha, ekologtardyń tekserý nátıjesi prokýratýraǵa jiberiledi. Qadaǵalaýshy organ odan ári atalǵan ken ornyna tekserý júrgizip, zań aıasynda shara qoldanýy tıis.
Táýelsiz ekolog Ádilbek Qozybaqtyń pikirinshe, ken oryndaryndaǵy tótenshe oqıǵalar aldyn-alý sharalarynyń júrgizilmeýinen bolyp otyr.
- Bundaı oqıǵalar memleket tarapynan qadaǵalaý jumystarynyń álsizdigin kórsetedi. Aldyn-alý, profılaktıkalyq baqylaý bolmaǵany ma? Jalpy, mundaı apattardyń bolashaqta aldyn alý úshin tek qana ekologııa departamenti emes, tótenshe jaǵdaılar organdary da baqylaý júrgizýi qajet.
Sonymen qatar, ashyqtyqty qamtamasyz etip, mindetti túrde táýelsiz sarapshylardy tartý kerek. Sebebi ol jerde qaýip qorshaǵan ortaǵa da, adam ómiri men densaýlyǵyna da tónip tur.
Osydan birneshe aı buryn «BýzachıOpereıtıng» kompanııasynda adam ólimi boldy. Sonyń ózi sabaq bolmaǵany ma? , — deıdi Ádilbek Qozybaq.
Buǵan deıin Mańǵystaý oblysynda ken ornyndaǵy uńǵymada tótenshe jaǵdaı bolǵany týraly jazǵan bolatynbyz.