Mańǵystaýda ken ornynda munaıdy zańsyz óndirý týraly aqparat tekserilip jatyr
AQTAÝ. KAZINFORM — 11 tamyzda áleýmettik jelide Mańǵystaý oblysyndaǵy «Dolınnoe» ken ornynda munaıdy zańsyz óndirý jáne ilespe gazdy atmosferaǵa shyǵaryp jatqany týraly beınejazba jarııalandy.
Onda jumysshylardyń biri ken óndirýshi kompanııa tarapynan jasalyp jatqan zańbuzýshylyqty jarııalady. Ol zańsyz munaı óndirýmen qatar, gazdyń dalaǵa jiberilip jatqanyn, saldarynan aýmaqty jaǵymsyz ıis jaılaǵanyn aıtqan.
Osydan keıin oblystyq ekologııa departmenti «Dolınnoe» ken ornynda munaıdy zańsyz óndirý jáne ilespe gazdy atmosferaǵa shyǵarý týraly aqparatty tekserip jatqanyn habarlady. Al atalǵan ken ornyn «Emir-Oıl» JShS ıgerip jatyr.
— Qazirgi ýaqytta áleýmettik jelide taraǵan aqparat Mańǵystaý oblystyq ekologııa departamentiniń baqylaýyna alyndy. Kórsetilgen mán-jaılardy jan-jaqty anyqtaý úshin jospardan tys tekserý júrgizý máselesi qaralady. Anyqtalǵan faktilerge ekologııalyq jáne quqyqtyq baǵa beriledi. Zańnama talaptarynyń buzylǵany anyqtalǵan jaǵdaıda tıisti sharalar qabyldanady, — delingen habarlamada.
Eske salaıyq, buǵan deıin Mańǵystaý oblysy Jetibaı aýyly mańyndaǵy qoqys polıgony eki kúnnen beri tutanyp jatqanyn jazǵanbyz.
