Mańǵystaýda «QazAzottaǵy» jarylystan zardap shekken jumysshy aýrýhanada kóz jumdy
AQTAÝ. KAZINFORM – 57 jastaǵy azamat óndiris ornyndaǵy jazataıym oqıǵadan keıin dereý aýrýhanaǵa jetkizilgen. Ol 28 shildede qaıtys boldy.
– 28 shilde kúni saǵat 14:21 shamasynda medıtsına qyzmetkerleri azamattyń bıologııalyq ólimin tirkedi. Marqum 2021 jyldyń 21 maýsymynan beri zaýytta kran mashınısi bolyp jumys istegen. Apattan zardap shekken taǵy úsh jumysshy aýrýhanada em qabyldap jatyr, - deıdi Mańǵystaý oblystyq memlekettik eńbek ınspektsııasy departamentiniń ókilderi.
Al «QazAzot» AQ ókilderi qyzmetkerdiń otbasyna jan-jaqty kómek kórsetilip jatqanyn málimdedi.
– Qaıtys bolǵan áriptesimizdiń otbasyna kompanııa tarapynan qajetti qoldaý kórsetilip jatyr. Keshe úıine baryp, qoldan kelgen kómegimizdi usynatynymyzdy jetkizdik. Janaza namazynan keıin qarjylyq máseleler mekeme basshylyǵy men otbasy músheleriniń arasynda talqylanady. Otbasyna qaıǵyryp kóńil aıtamyz, - dedi kompanııanyń baspasóz hatshysy.
Eske salaıyq, kásiporyndaǵy apat 18 shilde kúni saǵat 14:00 shamasynda bolǵan. Eńbek ınspektsııasynyń málimetinshe, jumysshylar ruqsat qujattarynsyz gaz keskish quralyn paıdalanyp, qubyr jelisindegi aqaýdy joıýǵa árekettengen. Saldarynan tonnel ishinde gaz-aýa qospasy jarylyp, tórt jumysshyny kúıik shaldy.
Oqıǵa boıynsha eńbek ınspektsııasy departamenti men tótenshe jaǵdaılar departamenti arnaıy komıssııa quryp, tergep-tekserý jumystary júrgizip jatyr.
Buǵan deıin Mańǵystaýda «KazAzot» zaýytyndaǵy oqys oqıǵadan jumysshylar zardap shekkeni týraly jazǵan bolatynbyz