Mańǵystaýda qaza tapqan batysqazaqstandyq sarbazdyń týǵan jerine oralýyna sanaýly kúnder qalǵan edi
ORAL. KAZINFORM — Mańǵystaý oblysynda oqý-jattyǵý kezinde qaza tapqan sarbazdardyń biri Ómirbek Ómirzaqtyń denesi Terekti aýdany Podstepnyı aýylyndaǵy úıine jetkizilip, marqumnyń otbasyna jerlesteri kóńil aıtyp jatyr.
Teńiz-áskerı kúshteri bas qolbasshysynyń orynbasary Arman Satqanovtyń málim etkenindeı, sarbazdardyń áskerı boryshyn ótep bitirýine segiz kún qalǵan. Úılerine qaıtýǵa bıletter alynyp qoıylǵan.
— Jaýyngerler áskerı-teńiz bazasy teńiz jaıaý áskeriniń desanttyq-shabýyldaý batalony quramynda jaqsy qyzmet etti. Buǵan deıin eki jattyǵý ótkizildi. Bul búkil Qazaqstan boıynsha ótkizilgen qorytyndy strategııalyq komandalyq-shtabtyq jattyǵý edi. Jigitter jaǵaǵa túsiriletini jóninde bildi. Teńiz desantynyń jaǵaǵa túsirilýi epızodtardyń biri bolatyn. Bári qalypty edi. Biraq túsirý kezinde tolqyn kóterilip, olardy basyp qaldy. Qazirgi kezde memlekettik komıssııa qurylyp, tergeý amaldary júrgizilýde. Oqıǵaǵa qatysy barlardyń bári jaýap berip jatyr. Mınıstrlik tarapynan qaza tapqandardyń otbasylaryna psıhologııalyq, qarjylaı kómek kórsetilip jatyr, — dedi A.Satqanov.
Bókeı ordasy aýdanynda dúnıege kelip, Báıterek aýdanynda Volodar orta mektebin bitirgen Ómirbek Ómirzaqtyń ákesi Ómirbolattyń aıtýynsha, uly ótken jyly 3 qazanda áskerge attanǵan. Aldaǵy 5 qazanda qarsy alýlary kerek edi, soǵan jete almaı ketti. Ómirbek áskerı boryshyn ótep kelgennen keıin polıtsııa qatarynda qyzmet etýdi maqsat etken.
Eske sala keteıik, budan buryn Mańǵystaýda qaza tapqan áskerı qyzmetshilerdi aty-jónderi belgili bolǵanyn jazǵan edik.
Sondaı-aq Mańǵystaýda qaza tapqan batysqazaqstandyq sarbazdardyń denesi Oralǵa jetkizildi.
Mańǵystaýda qaza tapqan sarbazdyń ustazy shákirtiniń úlken áýlettiń úkilegen úmiti bolǵanyn aıtty.
