Mańǵystaýda qaza tapqan batysqazaqstandyq sarbazdardyń denesi Oralǵa jetkizildi
ORAL. KAZINFORM — 25 qyrkúıek kúni saǵat 8:45-te Oral qalasynyń áýejaıyna Mańǵystaý oblysyndaǵy qaıǵyly oqıǵa saldarynan qaza tapqan batysqazaqstandyq áskerı qyzmetshiler Jeńis Temirǵalıev, Ómirbek Ómirzaq jáne Aqjaıyq Ǵılajdyń denesi arnaıy reıspen jetkizildi.
BQO ákiminiń baspasóz qyzmetinen málim etkenindeı, marqumdardy aqtyq saparǵa shyǵaryp salý jáne jerleý rásimderi 26 qyrkúıek kúni ótedi.
— Memleket basshysynyń tapsyrmasymen qaza tapqandardyń otbasylaryna jergilikti atqarýshy organdar tarapynan materıaldyq kómek kórsetiledi. Sondaı-aq, bul iske bıznes ókilderi de atsalysady. Jerleý rásimderin uıymdastyrý boıynsha barlyq qajetti sharalar qabyldanýda. Atalǵan jaǵdaı oblys ákiminiń tikeleı baqylaýynda, — delingen resmı málimette.
Báıterek aýdany ákimdiginiń málimetine qaraǵanda, Bókeı ordasy aýdanynda dúnıege kelgen, Báıterek aýdanynyń Baıqonys aýyly, Volodar eldi mekeniniń turǵyny Ómirbek Ómirzaq 2025 jylǵy 25 qazanda ásker qataryna shaqyrylǵan.
Kaztalov aýdany ákimdiginiń málimeti boıynsha Aqjaıyq Ǵılaj osy aýdannyń Qaraoba aýylynan attanǵan.
Bórli aýdany ákimdiginiń deregine sáıkes Jeńis Temirǵalıev — Aqsaı qalasynyń týmasy.
Osyǵan oraı atalǵan aýdan ákimdikteri de sarbazdardyń otbasy men týma-týysqandaryna kóńil aıtty.
Eske sala keteıik, budan buryn Mańǵystaýda qaza tapqan áskerı qyzmetshilerdi aty-jónderi belgili bolǵanyn jazǵan edik.
