Mańǵystaýda qaza tapqan áskerı qyzmetshilerdiń otbasylaryna jınalǵan qarajat kólemi jarııalanbaıdy
ASTANA. KAZINFORM — Bul týraly Qazaqstan Halyq Keńesiniń múshesi, Mańǵystaý oblysy qoǵamdyq keńesiniń tóraǵasy Bekmurat Júsipov aıtty.
— Mańǵystaý oblysynda qaza tapqandardyń otbasylary men zardap shekken áskerı qyzmetshilerge kórsetilgen qarjylaı kómektiń bólinýin baqylaý jónindegi komıssııa jumysynyń nátıjesi týraly habarlaǵym keledi.
Ózderińiz biletindeı, Memleket basshysy Qasym-Jomart Kemeluly Toqaevtyń tapsyrmasyna sáıkes qaza tapqandardyń otbasylaryna jáne zardap shekken áskerı qyzmetshilerge qajetti barlyq kómek pen qoldaý kórsetilip jatyr, — dedi Bekmurat Júsipov.
Elimizdiń iri kásiporyndary, kásipkerleri men metsenattarynan túsken qarjyny jınaqtaý úshin arnaıy «Ulttyq rýh» qory belgilendi.
— Túsken qarajattyń ádil ári maqsatty bólinýin qamtamasyz etý úshin arnaıy Komıssııa quryldy. Onyń quramyna quqyq qorǵaý organdary men qoǵam ókilderi, Quryltaı depýtattary, Qazaqstan Halyq Keńesiniń músheleri, qoǵamdyq keńester men máslıhattardyń ókilderi kirdi.
Komıssııa jumysynyń qorytyndysy boıynsha qorǵa túsken barlyq qarajat Komıssııa qabyldaǵan sheshimderge sáıkes jáne zańnamada belgilengen tártippen qaza tapqan áskerı qyzmetshilerdiń otbasylaryna ádil ári teńdeı bólindi, — dedi ol.
Sonymen qatar, bolǵan oqıǵadan aman qalǵan áskerı qyzmetshilerge de jeke tólemder qarastyryldy. Olarǵa kórsetilgen materıaldyq kómektiń mólsheri Komıssııa sheshimderine sáıkes belgilendi.
— Qarajatty esepke alý men bólýge qatysty barlyq sheshim tek Komıssııa sheńberinde qabyldanyp, tıisti hattamalarmen rásimdeldi jáne belgilengen quqyqtyq rásimder tolyq saqtaldy. Bul jumysqa qaza tapqan sarbazdardyń ata-analary da qatysty.
Komıssııa qarajattyń qor shotyna túsýinen bastap, aýdarýǵa deıingi barlyq kezeńde qatań baqylaýdy qamtamasyz etti.
Sonymen birge, áskerı qyzmetshilerdiń týǵan-týystary men jaqyndarynyń ótinishin eskere otyryp, sondaı-aq olardyń qaýipsizdigi men jeke málimetteriniń qupııalylyǵyn saqtaý maqsatynda tólemderdiń naqty somasy men qarajat alýshylardyń derbes derekteri jarııa etilmeıdi.
Qaza tapqan jáne zardap shekken áskerı qyzmetshilerdiń týǵan-týystary men jaqyndarynyń bul sheshimine túsinistikpen qaraýlaryńyzdy suraımyz.
Komıssııa óz jumysyn aıaqtady. Túsken qarajattyń barlyǵy belgilengen tártippen bólinip, qabyldanǵan sheshimder tıisti qujattarmen rásimdeldi. Senim bildirip, túsinistik tanytqandaryńyz úshin alǵys aıtamyn, — dedi Qazaqstan Halyq Keńesiniń múshesi.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
