Prezıdent Mańǵystaýda qaza tapqan áskerılerdiń otbasylaryna jedelhat joldady
ASTANA. KAZINFORM — Memleket basshysy Qasym-Jomart Toqaev Mańǵystaý oblysynda qaza tapqan áskerı qyzmetshilerdiń otbasylaryna kóńil aıtyp, ataýly jedelhattar joldady.
Jedelhattardy Mańǵystaý jáne Túrkistan oblystarynyń basshylary, Bas múftı Naýryzbaı Taǵanuly men qoǵam belsendileri oqyp, tabystady.
— Prezıdent marqumdardyń týǵan-týystary men jaqyndaryna qoldaý bildirip, olarǵa barlyq qajetti kómek kórsetiletinin, al kináliler eń qatań jazaǵa tartylatynyn aıtty. Qasym-Jomart Toqaevtyń jedelhatynda áskerı qyzmetshilerdiń memlekettik marapattarǵa usynylatyny aıryqsha atap ótildi, — delingen habarlamada.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustaldy.
Qorǵanys mınıstri, avıatsııa general-leıtenanty Dáýren Qosanov kináli tulǵalar jaýapkershilikten jaltarmaıtynyn aıtty.
