Mańǵystaýda qaýipti manevrmen tabıǵatqa zııan keltirgen júrgizýshi 10 táýlikke qamaldy
AQTAÝ. KAZINFORM – Mańǵystaý oblysy aýmaǵynda Aıraqty-Shomanaı alqabynda túsirilgen vıdeo áleýmettik jelide qyzý talqylanyp, kópshiliktiń narazylyǵyn týdyrǵan bolatyn. Onda júrgizýshiler qaýipti manevrlar jasap, vıdeoǵa túsirgen.
Polıtsııa departamentiniń málimetinshe, Mercedes kóliginiń áreketi jol qaýipsizdigine qaýip tóndirip qana qoımaı, qorshaǵan ortaǵa da zııan keltirgen. Keıin quqyq buzýshynyń 24 jastaǵy júrgizýshi ekeni anyqtalǵan. Ol kólikti memlekettik tirkeý nómirinsiz basqarǵan jáne buǵan deıin de osyndaı quqyqbuzýshylyq úshin jaýapqa tartylǵan bolyp shyqty. Júrgizýshige birneshe ákimshilik jaza qoldanylyp, kólik aıyp turaǵyna qoıyldy.
Mańǵystaý oblystyq sotynyń málimetinshe, júrgizýshiniń áreketi Qazaqstan Respýblıkasy Ákimshilik quqyq buzýshylyq týraly kodeksiniń 434-baby (usaq buzaqylyq) boıynsha saralanyp, sotta quqyq buzýshynyń kinási tolyq dáleldengen.
Atalǵan bap boıynsha aıyppul nemese ákimshilik qamaýǵa alý jazasy qarastyrylǵan. Nátıjesinde sot oǵan 10 táýlikke ákimshilik qamaý jazasyn taǵaıyndady.
Buǵan deıin, Qyzylordada unatqan qyzyn úsh jyl ańdyǵan jigit 500 myń teńge tólep, 25 táýlikke qamalǵany týraly jazǵan bolatynbyz.
