Mańǵystaýda qatty jel turǵyn úıdiń shatyryn julyp áketti
AQTAÝ. KAZINFORM – Mańǵystaý oblysynda qatty jeldiń saldarynan turǵyn úıdiń shatyry ushyp ketti. Qaraqııa aýdany ákimdiginiń málimetinshe, oqıǵa Quryq aýylynda bolǵan. Turǵyn úıde jóndeý jumystary júrgizilip jatqan. Alaıda qolaısyz aýa raıyna baılanysty shatyr jabynyn tolyq aıaqtap úlgermegen.
Qatty jel saldarynan ǵımarat shatyrynyń bir bóligi julynyp ketken.
Dron arqyly túsirilgen kadrlardan shatyrdyń edáýir bóligi joq ekeni kórinedi. Aǵash konstrýktsııalary ashyq qalǵan, al jabyn ústinde qurylys materıaldary men kirpishterdiń synyqtary jatyr.
-Qazirgi ýaqytta nysanda qalpyna keltirý jumystary júrgizilip jatyr. Mamandar shatyrdyń zaqymdanǵan bóligin jóndep, jabyndyny tıisti jaǵdaıǵa keltirý ústinde. Abyroı bolǵanda, oqıǵa saldarynan zardap shekkender joq, - delingen habarlamada.
Aqtaý qalasynda da daýyldan keıingi qalpyna keltirý jáne sanıtarlyq tazalyq jumystary júrgizilip jatyr.
-Daýyl saldarynan qulaǵan aǵashtar kesilip, qaýipsiz aýmaqtarǵa shyǵarylyp jatyr. Sonymen qatar jol jıekteri men qoǵamdyq oryndarda jınalǵan qoqys tazalanyp, aýmaqtarǵa sanıtarlyq tazalyq jumystary júrgizilý ústinde. Kommýnaldyq qyzmetter qala aýmaǵynyń tazalyǵyn qamtamasyz etý jáne tabıǵı qubylystyń saldaryn joıý jumystaryn kúsheıtilgen rejımde júrgizip jatyr, - dep habarlady Aqtaý qalasy ákimdiginiń baspasóz qyzmeti.
Buǵan deıin, aldaǵy úsh kúnde jańbyr jaýyp, aýa temperatýrasy 28 gradýsqa deıin kóteriletini týraly jazdyq.
