Mańǵystaýda kásipkerlerdiń quqyǵyn buzǵandarǵa 9,1 mln teńge aıyppul salyndy

Mańǵystaý oblysy Túpqaraǵan aýdanynyń prokýratýrasy Investorlardyń quqyqtaryn qorǵaý komıtetimen birlesip, kásipkerlikti ınjenerlik jelilerge qosý kezindegi zańsyz tájirıbeniń jolyn kesti. 

— Qabyldanǵan sharalar nátıjesinde 3 ınvestor men 16 kásipkerdiń quqyǵy qorǵalyp, kináli laýazymdy tulǵalar ákimshilik jaýaptylyqqa tartyldy, olarǵa jalpy somasy 9,1 mln teńge aıyppul salyndy.

Qadaǵalaý sharalary barysynda tabıǵı monopolııa sýbektileri elektr jáne sýmen jabdyqtaý jelilerine qosýǵa tehnıkalyq shart bergen kezde kásipkerlerden qoldanystaǵy zańnamada kózdelmegen qujattardy negizsiz talap etkeni anyqtaldy, — delingen habarlamada.

Sondaı-aq qyzmet kórsetý tártibiniń buzylǵan faktileri anyqtaldy: tehnıkalyq shart berýden bas tartý týraly ýákiletti organdardy habardar etpeý, sondaı-aq ınvestorlar men kásipkerlerdiń ótinishterin qaraýdyń belgilengen merzimderin buzý.

Prokýrorlyq den qoıý aktileri boıynsha eki tabıǵı monopolııa sýbektisine qatysty ákimshilik quqyq buzýshylyq týraly 16 is qozǵaldy. Olardy qaraý qorytyndysy boıynsha kináli laýazymdy tulǵalar jaýaptylyqqa tartylyp, aıyppul tolyq kólemde óndirildi.

Qabyldanǵan sharalar ákimshilik kedergilerdi joıýǵa, ınvestorlar men kásipkerlerdiń buzylǵan quqyqtaryn qalpyna keltirýge jáne ınjenerlik jelilerge qosý kezinde zańnamanyń saqtalýyn qamtamasyz etýge múmkindik berdi. 

Aıta ketelik Oralda prokýratýra 25 azamattyń turǵyn úı máselesin sheshken edi.