Mańǵystaýda Kaspııge batyp ketken 27 jastaǵy er adamdy izdeý jumystary áli júrip jatyr
AQTAÝ. KAZINFORM — Mańǵystaýda Munaıly aýdanynda Kaspıı teńizine batyp ketken 27 jastaǵy er adamdy izdeý jumystary jalǵasyp jatyr. Qaıǵyly jaǵdaı 21 maýsym kúni Aqtaý qalasynan 56 shaqyrym qashyqta jabdyqtalmaǵan jaǵalaý aýmaǵynda bolǵan.
Mańǵystaý oblystyq tótenshe jaǵdaılar departamentiniń málimetinshe, aýa raıynyń qolaısyzdyǵyna qaramastan qutqarý operatsııasy toqtaǵan joq. Іzdeý jumystaryna tótenshe jaǵdaılar departamentiniń 11 qyzmetkeri, tórt arnaıy tehnıka, eki júzý quraly, súńgýirler jáne sýasty drony jumyldyrylǵan.
Tótenshe jaǵdaılar departamentiniń resmı ókili Erlan Soltanmuratovtyń aıtýynsha, ekpindi jel izdeý jumystaryna aıtarlyqtaı qıyndyq týǵyzǵan.
-Qutqarýshylar tańerteńnen bastap teńizdiń tynyshtalýyn kútti. Búgin izdeý jumystary qaıta jalǵasty. Qazirgi ýaqytta er adamnyń denesi áli tabylǵan joq, - deıdi ol.
Departamenttiń málimetinshe, shomylý maýsymy bastalǵaly beri Mańǵystaý oblysynda 4 adam sýǵa ketip, qaza bolǵan. Úsh adamnyń denesi tabylsa, tórtinshi adamdy izdeý jumystary áli jalǵasyp jatyr. Sonymen qatar, qutqarýshylar maýsym bastalǵaly sýdan toǵyz adamdy qutqarǵan. Olardyń basym bóligi - balalar.
Buǵan deıin, Mańǵystaýda on kúnde bes balany qaraqurt shaqty.
