Mańǵystaýda Kaspııdiń jaǵalaýynan óli aqqýlar tabyldy
AQTAÝ. KAZINFORM — Teńiz jaǵasynda qyrylyp jatqan qanattylardy jergilikti turǵyn baıqaǵan. Ol bul týraly áleýmettik jelide jarııalady.
Aıtýynsha, ólekselerdiń arasynda jaqyn arada ólgen aqqýlar da, uzaq ýaqyt jatyp qalǵandary da bar.
Osy oqıǵa boıynsha oblystyq orman sharýashylyǵy jáne janýarlar dúnıesi aýmaqtyq ınspektsııasynyń habarlaýynsha, qustardyń jappaı ólimi tirkelmegen.
— Búgin, 25 naýryzda, Saıyn Shapaǵatov aýylyndaǵy jaǵalaý syzyǵynan 11 aqqýdyń óleksesi anyqtaldy. Barlyq qus belgilengen tártipke sáıkes joıyldy. Jaǵalaýda qustardyń jappaı qyrylý deregi tirkelgen joq, — delingen habarlamada.
Qazirgi ýaqytta Túpqaraǵan aýdany men Aqtaý qalasynyń jaǵalaý aımaǵynda monıtorıng jumystary júrgizilip jatyr. Atalǵan jaǵdaı týraly quzyrly organdarǵa habar berilip, tıisti qyzmetterdiń jumysy uıymdastyrylǵan.
Sondaı-aq, Qaraqııa-Qarakól qoryqshasynyń aýmaǵynda ornalasqan Qarakól kólinde qustardyń qyrylý jaǵdaılary tirkelmegeni naqtylandy.
Buǵan deıin, Kaspıı jaǵalaýynan Qyzyl kitapqa engen birqazan óli kúıde tabylǵan bolatyn.