Mańǵystaýda Kaspııdiń taıyzdanýyna baılanysty sý alý arnasy tereńdetiledi
AQTAÝ. KAZINFORM – Mańǵystaý atom energııa kombınatynyń habarlaýynsha, TETs-2 sý alý arnasynyń túbin tereńdetý jumystary júrgiziledi. Buǵan Kaspıı teńiziniń taıyzdanýy sebep bolyp otyr.
Kásiporynnyń málimetinshe, 2025 jyldyń qazan aıynda «Qazgıdromet» mekemesiniń derekteri boıynsha teńiz deńgeıi Baltyq bıiktigi júıesi boıynsha 29,71 metr belgisinde tirkelgen. Salystyrmaly túrde alǵanda, 1995 jyly bul kórsetkish 26,85 metr boldy. ıAǵnı, sý qoımasynyń deńgeıi 2,8 metrge tómendegen.
«MAEK» JShS Bas dırektorynyń óndiris jáne BN-350 reaktory jónindegi orynbasary Erbolat Ibragımovtiń aıtýynsha, qalyptasqan jaǵdaı TETs-2 sý alý arnasy aýdanynda jaǵalaý syzyǵynyń sheginýine alyp kelgen. Buryn arnanyń teńiz jaq bóligi 590 metr bolsa, qazirgi tańda ol 145 metrge deıin qysqarǵan.
– Sondaı-aq sý alý arnasynyń ońtústik-shyǵysynda eni 500 metrden asatyn taıyz aımaqtar paıda bolǵan. Teńiz deńgeıiniń ári qaraı tómendeýi, TETs-2 arnasyna keletin teńiz sýynyń aıtarlyqtaı azaıýyna ákeledi, - deıdi Erbolat Ibragımov.
Buǵan deıin 2024 jyly qarashadan 2025 jyldyń aqpan aıyna deıingi aralyqta arnany tereńdetý jumystary júrgizilgen. Ol kezde 500 metr aýmaqta tazalaý jáne tereńdetý jumystary qolǵa alyndy.
Mańǵystaý atom energııa kombınatynyń habarlaýynsha, qazir teńiz sýynyń turaqty kelýin qamtamasyz etý maqsatynda, arnany ary qaraı da tereńdetý jáne oǵan irgeles akvatorııany keńeıtý boıynsha daıyndyq jumystary júrip jatyr.
Eske salsaq, budan buryn Qazgıdromet Kaspıı deńgeıi 2050 jylǵa qaraı 5,5 metr tómendeýi múmkin ekenin boljaǵan.