Mańǵystaýda Kaspıı jaǵalaýynda bir kúnde eki adam sýǵa batyp, ajal qushty
AQTAÝ. KAZINFORM — Mańǵystaý oblysynda Kaspıı teńiziniń shomylýǵa jabdyqtalmaǵan jaǵalaýynda eki adam sýǵa batyp ketti.
Mańǵystaý oblystyq tótenshe jaǵdaılar departamentiniń málimetinshe, qaıǵyly oqıǵalar 6 shilde kúni Aqtaý qalasynan 41–42 shaqyrym qashyqtyqta ornalasqan Kaspıı teńiziniń jaǵalaýynda tirkelgen.
Alǵashqy jaǵdaıda 1984 jyly týǵan er adam shomylýǵa jabdyqtalmaǵan orynda sýǵa túsip, batyp ketken. Onyń denesin sýdan kýágerler alyp shyqqan.
Arada kóp ýaqyt ótpeı, alǵashqy oqıǵa bolǵan jerden alys emes aýmaqta taǵy bir qaıǵyly jaǵdaı bolǵany týraly habar túsken. Qutqarýshylar jetkenge deıin kýágerler 2012 jyly týǵan balanyń denesin sýdan shyǵarǵan.
Sondaı-aq kýágerler 2018 jyly týǵan balany jáne onyń 1991 jyly týǵan ákesin qutqaryp qalǵan.
— 2018 jyly týǵan bala Aqtaý qalasyndaǵy oblystyq balalar aýrýhanasyna jetkizildi. Dárigerlerdiń tekserýinen keıin 1991 jyly týǵan er adam úıine jiberildi, — dep habarlady oblystyq tótenshe jaǵdaılar departamentiniń baspasóz qyzmeti.
Oqıǵa ornyna tótenshe jaǵdaılar departamentiniń kúshteri men quraldary jumyldyryldy.
Vedomstvo ókilderi azamattardy tek arnaıy jabdyqtalǵan jaǵajaılarda ǵana shomylýǵa shaqyryp, qaýipsizdik talaptaryn qatań saqtaýdy eskertti. Sondaı-aq balalardy sý aıdyndarynyń mańynda qaraýsyz qaldyrmaýǵa keńes berdi.
Buǵan deıin Beket ataǵa zııarat etýge ketip, iz-túzsiz joǵalǵan azamattar tabylǵanyn jazǵan edik.
