Mańǵystaýda káriz qubyry jarylyp, qorshaǵan ortany lastady

AQTAÝ. KAZINFORM — Las sýdyń atqylap jatqan beınejazbasy jelide tarady. Turǵyndar káriz qubyrynan shyqqan aǵyndynyń aınalany búldirip, jaǵymsyz ıiske tushyǵyp otyrǵandaryn aıtyp, dabyl qaqty.

Osy oqıǵa boıynsha «Kaspıı jylý, sý arnasy» mekemesi resmı málimet taratty. Aıtýlarynsha, Baskudyq aýyly mańynda, Alaý aýylyna jaqyn jerde káriz tazartý qurylystary KOS-1 men KOS-2 arasyndaǵy qubyr jelisinde apat bolyp, las sý tógilgen.

— Saǵat shamamen 17:00–de KOS-1 men KOS-2 nysandaryn qosatyn Dý-710 PE sol jaq qysymdy qubyr jelisinde tesik paıda bolyp, saldarynan bul qubyrdyń jumysy ýaqytsha toqtatyldy. Tógilgen tazartylǵan sýdyń kólemi shamamen 30 tekshe metrdi qurady. Qazirgi ýaqytta KOS-1 nysanynan KOS-2 nysanyna deıin tazartylǵan sýdyń berilýi oń jaq qysymdy kollektor arqyly shtattyq rejımde júzege asyrylyp jatyr. Apat jedel túrde joıyldy, — delingen habarlamada. 

«Kaspıı jylý, sý arnasy» mekemesiniń habarlaýynsha, qazirgi tańda oblystyq ekologııa departamenti men Tabıǵı resýrstar basqarmasy beınejazbadaǵy tógindiniń sebepteri men mán-jaılaryn anyqtaý jumystary júrgizip jatyr. Sýdyń quramy men kólemine qatysty taldaý jumystary júrgizilmek.

Buǵan deıin, Aqtaýda polıtseıler júk kóliginiń júrgizýshisin jerge shege tósep, toqtatqanyn jazǵan bolatynbyz.