Mańǵystaýda qarǵyn sý joldy shaıyp ketti

AQTAÝ. KAZINFORM – Shetpe aýyly mańynda qatty jaýǵan nóser jańbyrdan jol shaıylyp ketken. Jergilikti turǵyndar joldardyń búlingenin, temirjol boıymen jáne jeke úılerdiń janymen sý aǵyp jatqanyn beınejazbaǵa túsirgen. Olardyń aıtýynsha, jańbyr birneshe saǵat boıy toqtamaı jaýǵan. Sol kezde joldy sý shaıyp, kólik qozǵalysy qıyndaǵan.

Mańǵystaý aýdany ákimdiginiń málimetinshe, qazir jaǵdaı qalypty. Aýlalaryna sý kirgen úılerge kómek kórsetilip jatyr.

- Shetpe aýylynda saǵat 11.50- de bastalǵan ótkinshi jańbyr saǵat 12. 25 -ke deıin ekpinmen jaýyp ótti. Keıbir sý jınalatyn aýmaqtarǵa, turǵyn úıler men aýlasyna sý ketý jaǵdaılary kezdesti. Aýdandyq №8 órt sóndirý bóliminiń 101 jedel jelisine 15 sýdan zııan shekken turǵyn úı ıelerinen qońyraý túsip tirkelgen. Ol úılerge sýdan tazartý jumystary júrgizilip jatyr. Sonymen birge aýdandyq tótenshe jaǵdaı bólimi men aýyl ákimdigi birlesip sý ketken 12 úılerdi aralap qaýiptilik deńgeıin anyqtap, múmkindigine qaraı kómektesýdi jalǵastyryp jatyr, - delingen habarlamada.

Buǵan deıin, Mańǵystaýda jyl basynan beri 10 myń tonnaǵa jýyq qoqys shyǵarylǵany týraly jazǵan bolatynbyz.