Mańǵystaýda qaraqurttan zardap shekkender sany artty
AQTAÝ. KAZINFORM — Mańǵystaý oblysynda sońǵy bir aıda qaraqurt shaǵýynan 23 adam zardap shekti. Onyń altaýy jansaqtaý bóliminde em qabyldaǵan. Mamandar bıyl asa qaýipti jándiktiń belsendiligi ádettegiden erte bastalǵanyn aıtyp, turǵyndardy saq bolýǵa shaqyryp otyr.
Mamandardyń málimetinshe, oblysta qaraqurt shaǵý deregi Mańǵystaý aýdanynda jıi tirkelgen. Bul aýdanda 7 adam zardap shekken. Munaıly jáne Beıneý aýdandarynda alty jaǵdaı anyqtalǵan. Al Aqtaý qalasynda qaraqurt shaqqan eki bala medıtsınalyq kómekke júgingen.
Oblystyq kópbeıindi balalar aýrýhanasynyń dırektory Janar Dosjanova sońǵy 10 kúnde eki balanyń qaraqurt shaǵýymen túskenin aıtty. Eki bala da jansaqtaý bóliminde bolyp, alǵashqy kómek kórsetilgennen keıin jaǵdaıy turaqtalǵan.
Mamandardyń aıtýynsha, qaraqurttyń ýy adamnyń júıke júıesine áser etedi. Jándik shaqqan jaǵdaıda qatty aýyrsyný, bulshyqetterdiń qurysýy, álsizdik jáne dene qyzýynyń kóterilýi baıqalýy múmkin. Ýaqytyly medıtsınalyq kómek kórsetilmese, naýqastyń jaǵdaıy kúrdelenýi yqtımal.
Oblystyq sanıtarııalyq-epıdemıologııalyq baqylaý departamentiniń bólim basshysy Mádına Rahmetova turǵyndarǵa tabıǵat aıasynda demalý jáne dala jumystaryn júrgizý kezinde saq bolýǵa keńes beredi. Sondaı-aq qora-jaılardy taza ustap, aýmaqtardy ýaqytyly tazalaý jáne qajet bolǵan jaǵdaıda dezınsektsııalyq jumystar júrgizý mańyzdy.
- Qaraqurt shaqqan jaǵdaıda adam qatty aýyrsyný, bulshyqetterdiń qurysýyn, álsizdik pen dene qyzýynyń kóterilýin sezinýi múmkin. Sondyqtan mundaı jaǵdaıda mindetti túrde, dereý jaqyn ornalasqan medıtsınalyq uıymǵa alǵashqy medıtsınalyq kómekke júginý qajet, - deıdi Mádına Rahmetova.
Buǵan deıin Baıanaýyldaǵy Toraıǵyr aýmaǵynda taǵy qaraqurt shyǵyp jatqanyn jazǵan bolatynbyz.
