Mańǵystaýda Qarakólge qaldyq sý aǵyzǵan qonaqúıdiń qubyr júıesi jumysyn toqtatty

Mańǵystaý oblysynda jeltoqsan aıynyń sońynan beri aqqýlardyń jappaı qyrylýynan soń Aqtaýdaǵy Rixos qonaqúıinen Qarakólge qaldyq sý jiberip otyrǵan qubyr júıesi jumysyn birjola toqtatty. Bul týraly óńirdiń ekologııa departamenti málimdedi.

Departament mamandarynyń shýly oqıǵadan soń bastaǵan tekserý jumystarynyń nátıjesinde «Aktau Tourism Ltd» tarapynan tabıǵatty qorǵaý zańnamasyn buzýǵa qatysty derekter anyqtalǵan.

«Qańtar aıynyń basynda departamentke Rixos qonaqúıine qatysty "Tabıgı orta" qaýymdastyǵynan ótinish tústi. Osydan keıin QR ÁQBtK-niń 331-babynyń 2-bóligi «Atmosferalyq aýany qorǵaý jáne sý obektilerin lastanýdan jáne bitelýden qorǵaý jónindegi talaptardy buzý» 328-babynyń 1-bóligimen ákimshilik ister qozǵaldy. Anyqtalǵan zań buzýshylyqtardy joıý jáne lastaýshy zattardyń ruqsat etilgen normalaryna sáıkes tazartý dárejesine jetkenge deıin nemese qalanyń káriz jelilerine sarqyndy sýlardy aǵyzǵanǵa deıin Qarakól kóline aǵyndy sýlardy jiberýdi toqtatý týraly uıǵarym shyǵaryldy», - dep jazylǵan departament málimetinde.

Sondaı-aq, daýǵa qalǵan qonaqúı basshylyǵy da ózderine tıisti jumystardy atqarǵanyn habarlady.

«Qazirgi ýaqytta qonaq úı qalalyq ortalyq káriz júıesine tolyq qosyldy. Osyǵan baılanysty qorshaǵan ortaǵa qandaı da bir antropogendik áser joq. Qosymsha Qarakól kóline qaldyq sý aǵatyn qubyrdy alý jumystary oryndaldy», - dep pikir bildirdi qonaqúı ákimshiligi.

Buǵan deıin Mańǵystaý oblysyndaǵy Qarakól aýmaǵyn qystaǵan aqqýlardyń jappaı qyrylǵany belgili boldy. Keıin olardyń sany arta tústi.

Keıin qustardy qyrylýyna qatysty sala mamandary zertteý júrgizetin boldy.

Osyǵan qatysty Mańǵystaý oblysy ákimdigi janynan jumys toby qurylyp, aqqýlardyń ólekselerin joıý jumystary qadaǵalaýǵa alyndy.

Budan bólek, aqqýlardyń qyrylýyna baılanysty qustar qonatyn Qarakólge «Rixos» qonaqúıinen tógiletin qaldyq sýdyń quramyna taldaý jasalǵan bolatyn.