Mańǵystaýda ıtbalyqtarmen qosa bekire tuqymdas balyqtar men sý qustary da qyrylyp jatyr

AQTAÝ. KAZINFORM – Túpqaraǵan aýdany aýmaǵyndaǵy teńiz jaǵalaýynda monıtorıng jumystary aıaqtalǵan joq. Sondyqtan ólgen sý janýarlarynyń sany áli de artýy múmkin. Búgingi kúnge 289 ıtbalyq anyqtaldy, - deıdi oblystyq balyq sharýashylyǵy jáne akvamádenıet qaýymdastyǵynyń basshysy Danııar Ákimjanov.

Qaýymdastyq basshysynyń aıtýynsha, ıtbalyqtardyń balyqshylardyń aýyna túsip ólýi múmkin emes. Óıtkeni, 300 ıtbalyqtyń birden aýǵa túsýi múmkin emes. Al aýǵa túsip ólgenderdiń denesinde izder qalyp qoıady.

- Itbalyqtardyń qyrylý jyl saıyn kúz jáne kóktem aılarynda qaıtalanyp otyr. Bizdiń balyqshylar Kaspıı teńizine aýdy jyl boıyna salady. Sondaı-aq, aýlary 24 saǵat boıy sýdyń astynda jatady. Endeshe, ıtbalyqtar nege tek kúzde, kóktemde óledi degen suraq týyndaıdy. Basqa baǵyttardan izdeý kerek dep oılaımyn. Ǵylymı zertteý ınstıtýttary durys jumys isteýleri kerek. Synamalar alady, biraq nátıjeleri bizdi qanaǵattandyrmaıdy. Áli kúnge naqty sebebin aıta almaı otyr, - deıdi oblystyq balyq sharýashylyǵy jáne akvamádenıet qaýymdastyǵynyń basshysy Danııar Ákimjanov.

Qaýymdastyq basshysy jaǵalaýdan ıtbalyqtarmen qatar, qustar men bekire tuqymdas balyqtardyń da ólekseleri tabylyp jatqanyn málimdedi.

- Tek ıtbalyqtardy jarııalap jatyr, biraq olarmen qatar ólgen bekire tuqymdas balyqtar men sý qustary da tabylyp jatyr. Atap aıtatyn bolsam, sýquzǵyn qustary, shaǵala bar, qasqaldaq, gagar degen qustardy óz kózimmen kórip, anyqtadym. Burynda bizderge aıtatyn edi 4 - stadııa, 5 -stadııaǵa deıin ydyrap ketken, ıtbalyqtardan synama alý múmkin emes dep. Endi osy jaǵdaıda ıtbalyqtar buzylmaǵan, ólgenderine 15-20 kún bolǵan, - deıdi Danııar Ákimjanov.

Buǵan deıin, Mańǵystaýlyq táýelsiz ekolog ıtbalyqtardyń ólimin zertteý úshin zańnamaǵa ózgerister qajet ekenin aıtqan bolatyn.