Mańǵystaýda ıtbalyqtardyń jappaı qyrylýy tyıylar emes: taǵy 35 ólekse tabyldy
AQTAÝ. KAZINFORM — Óli ıtbalyqtar Baýtın aýyly mańyndaǵy «Asan» jáne «Kasa» aımaqtary arasyndaǵy jaǵalaý bóliginde anyqtaldy. Bul týraly oblystyq Ekologııa departamenti habarlady.
19 mamyrda oblystyq balyq sharýashylyǵy basqarmasynyń janýarlar álemin qorǵaý qyzmetiniń ınspektorlary 35 ıtbalyqtyń jáne bekire tuqymdas balyqtardyń eleksesin tapqan.
— Osyǵan baılanysty ekologııa departamentiniń zerthanalyq-taldamalyq baqylaý bóliminiń mamandary atalǵan ýchaskede teńiz sýynan synamalar aldy. Sý synamalaryn zertteý nátıjeleri qosymsha habarlanatyn bolady, — delingen habarlamada.
Buǵan deıin 10-11 mamyr kúnderi Túpqaraǵan aýdanynyń Baýtın aýylyndaǵy jaǵalaýdan 37 óli ıtbalyq tabylǵan edi. Sol kezde de oblystyq ekologııa departamentiniń zerthanalyq-taldamalyq baqylaý bóliminiń mamandary teńiz sýynan synamalar aldy. Taldaý nátıjeleri boıynsha sýdyń quramynan lastaýshy zattar anyqtalǵan joq.
Buǵan deıin, Kaspıı jaǵalaýynan 300-ge jýyq ıtbalyqtyń óleksesi tabylǵan bolatyn.
