Mańǵystaýda ıtbalyqtardyń óleksesiniń sany júzden asty

AQTAÝ. KAZINFORM – Aımaqta ıtbalyqtardyń jappaı qyrylýy qaıta bastaldy. Keshe 3 qarashada Mańǵystaý oblystyq ekologııa departamentiniń mamandary balyq ınspektsııasy basqarmasymen birlesip, Túpqaraǵan aýdanyndaǵy jaǵalaýdan 112 Kaspıı ıtbalyǵynnyń óleksesin tapty.

Ekologtardyń habarlaýynsha, mamandar Túpqaraǵan aýdany Fort-Shevchenko, Baýtıno eldi mekenderiniń teńiz jaǵalaýynan sý synamalaryn alý jumystaryn júrgizgen. 

- Sonymen qatar, oblystyq balyq ınspektsııasy basqarmasymen birlesip, Asan eldi mekeninen Baýtıno múıisine deıingi Túpqaraǵan aýdanynyń jaǵalaý syzyǵyn monıtorıngteý barysynda, Kaspıı ıtbalyǵynyń 112 óleksesi anyqtaldy.

Onyń ishinde, Asan eldi mekeninen Fort-Shevchenko qalasynyń jaǵajaıyna deıin – 39, Fort-Shevchenko qalasynyń jaǵajaıynan Baýtıno múıisine deıin 73 ólekse anyqtaldy, - delingen habarlamada.

Buǵan deıin, Mańǵystaýda taǵy da ıtbalyq qyrylyp jatqanyn jazǵan bolatynbyz.