Mańǵystaýda ıtbalyqtar taǵy qyrylyp jatyr
AQTAÝ. KAZINFORM — Bul týraly «Qazaq balyk» Respýblıkalyq balyq sharýashylyǵy jáne akvamádenıet qaýymdastyǵynyń Mańǵystaý oblysy boıynsha fılıalynyń dırektory Danııar Ákimjanov habarlady.
Onyń aıtýynsha, Fort Shevchenko, Baýtıno aýyly jaǵalaýlary «Kosa» men «Asan» jaǵalaýlarynan 191 ıtbalyqtyń óleksesi tabylǵan. Oqıǵa ornynda quzyrly organ mamandary jumys istep jatyr.
Bul jaǵdaıdy quzyrly organdar da rastady. «Kaspıı ıtbalyǵy» memlekettik tabıǵı rezervatynyń qyzmetkerleri Jaıyq-Kaspıı oblysaralyq basseındik balyq sharýashylyǵy ınspektsııasymen jáne Túpqaraǵan aýdanynyń jergilikti atqarýshy organymen birlesip Mańǵystaý oblysy Túpqaraǵan aýdanyndaǵy Kaspıı teńizi jaǵalaýyn monıtorıngteý barysynda jaǵalaýǵa shyǵyp qalǵan ıtbalyqtardyń ólekselerin anyqtaǵan.
2026 jylǵy 17 sáýir saǵat 11:00–degi jaǵdaı boıynsha, batys jeliniń áserinen Túpqaraǵan aýdany aýmaǵyndaǵy Kaspıı teńizi jaǵalaýyna 97 ıtbalyq óleksesi shyǵarylǵan.
— Balyqtar men basqa da sý janýarlarynyń jappaı qyrylý qaýpiniń aldyn alý, sondaı-aq qyrylý saldaryn joıý boıynsha kómek kórsetý qaǵıdalaryna sáıkes jumys tobyn qurý, óli ıtbalyqtardan synama alý, ólimniń aldyn ala sebebin anyqtaý jáne ólekselerdi joıý jumystaryn uıymdastyrý maqsatynda oqıǵa ornyna «Kaspıı ıtbalyǵy» RMM, Balyq sharýashylyǵy ınspektsııasy, ákimdik, Túpqaraǵan aýdanynyń ishki ister bólimi, Ekologııa departamenti, Veterınarııalyq baqylaý jáne qadaǵalaý ınspektsııasy, Gıdrobıologııa jáne ekologııa ınstıtýty, Kaspıı ıtbalyǵyn zertteý jáne ońaltý ortalyǵy, «Qazaq Balyk» respýblıkalyq balyq sharýashylyqtary jáne akvakýltýra qaýymdastyǵy ókilderi bardy, — delingen habarlamada.
Gıdrobıologııa jáne ekologııa ınstıtýty qyzmetkerleriniń pikirinshe, ıtbalyqtar bir aıdan astam ýaqyt buryn ólgen, alaıda olar Mańǵystaý oblysy Túpqaraǵan aýdany jaǵalaýyna tek qazir batys daýyldy jeldiń áserinen shyǵarylǵan. Jaǵalaýdy monıtorıngteý jalǵasyp jatyr.
Buǵan deıin, Mańǵystaýda sońǵy tórt jylda 3 433 ıtbalyq qyrylǵanyn jazǵan bolatynbyz.