Mańǵystaýda ıtbalyqtar men bekire tuqymdas balyqtardyń óleksesi tabyldy
AQTAÝ. KAZINFORM — Túpqaraǵan aýdany aýmaǵynan teńiz sútqorektileriniń ólekseleri áli de tabylyp jatyr. 1 maýsym kúni 20 ıtbalyqtyń óleksesi anyqtalǵan. Bul týraly oblystyq ekologııa departamenti habarlady.
— 1 maýsym kúni Túpqaraǵan aýdany Fort Shevchenko qalasynda sý tuşytý zaýytynan bastap Baýtın «KCA» jaǵalaýyna deıingi aralyqta teńiz jaǵalaýynan 20 ıtbalyq pen 8 bekire tuqymdas balyqtyń óleksesi tabyldy. Soǵan oraı, 2 maýsym kúni Mańǵystaý oblysy boıynsha ekologııa departamenti zerthanalyq-taldamalyq baqylaý bólimi mamandary atalǵan aýmaqqa baryp, teńiz jaǵalaýynan sý synamalaryn alý jumystaryn júrgizdi. Synama qorytyndysy qosymsha habarlanady, — delingen habarlamada.
Buǵan deıin, Kaspıı jaǵalaýynan 300-ge jýyq ıtbalyqtyń óleksesi tabylǵan bolatyn.
Kaspıı jaǵalaýynan taǵy da ıtbalyqtardyń óleksesi tabyldy.
