Germanııa men Frantsııa ishten janý qozǵaltqyshy bar kólikterge tolyq tyıym salmaıdy
ASTANA. KAZINFORM — Berlın men Parıj Eýropanyń jańa kólikterge qoıatyn klımattyq talaptaryn qaıta qaraý boıynsha birlesken jospar jóninde kelisimge keldi, dep habarlaıdy BILD.
Oǵan sáıkes, avtoóndirýshiler jańa kólikteriniń ortasha CO₂ shyǵaryndysyn 2021 jylǵy deńgeımen salystyrǵanda 90%-ǵa tómendetse jetkilikti, al qazirgi EO erejeleri 100%-ǵa tómendetýdi talap etedi
Demek, 2035 jyldan keıin avtomobıl kompanııasy shyǵaratyn barlyq modeliniń ortasha kórsetkishi joǵarydaǵy talapqa saı bolsa, jańa benzın jáne dızeldi kólikterdi satýyna bolady. Degenmen, bul barlyq ishten janý qozǵaltqyshy bar kólikterdi shekteýsiz shyǵarýǵa ruqsat berý degendi bildirmeıdi.
Eýropa komıssııasy erejelerdi jeńildetýdi usynǵan bolatyn. EO usynysy boıynsha, eger kólik shyǵaryndylary 90%-ǵa deıin tómendese, qalǵan 10%-dy tómen kómirtekti bolatty jáne balama otyndardy qoldaný arqyly óteýge bolady. Frantsııa men Germanııa kelisimi boıynsha, avtokontsernder osy 10 paıyzdyq óteýden qutylady.
Esesine Germanııa «Eýropada jasalǵan» degen qatań erejelerdi qoldaýǵa kelisti. Memlekettik sýbsıdııalar men basqa da qoldaý sharalaryn Eýropadaǵy avtomobılder men komponentter óndirisimen tyǵyz baılanystyrý josparlanyp otyr. Belgili bir jaǵdaılarda Ulybrıtanııanyń da osy sanatqa qosylýyna bolady.
Kantsler Frıdrıh Merts pen Frantsııa prezıdenti Emmanıýel Makron bul kelisim eýropalyq avtoónerkásipke jumys oryndaryn jáne básekege qabilettilikti saqtaýǵa kómektesedi dep úmittenedi. Degenmen, bul EO-nyń sońǵy sheshimi emes, eki eldiń ortaq ustanymy. Usynysty endigi ýaqytta qalǵan múshe memleketter men Eýropa parlamenti maquldaýy kerek.
Buǵan deıin Germanııanyń avtokólik ónerkásibi básekedegi ornyn joǵaltyp jatqany habarlanǵan.
Qytaı avtokólik qaýipsizdigine qoıylatyn talapty qataıtpaq.
