Mańǵystaýda ınfektsııa juqtyrǵan oqýshylardyń barlyǵy aýrýhanadan shyqty
ASTANA. KAZINFORM - Búgingi tańda Mańǵystaý oblysynda ınfektsııadan zardap shekken 98 balanyń barlyǵy oblystyq kópbeıindi balalar aýrýhanasynyń ınfektsııalyq bólimshesinde statsıonarlyq em aldy.
Olar úılerine shyǵarylyp, turǵylyqty jeri boıynsha ambýlatorııalyq baqylaýǵa alyndy, dep habarlaıdy QR Densaýlyq saqtaý mınıstrliginiń baspasóz qyzmeti.
Baspasóz qyzmetiniń málimetterine qaraǵanda, 6 qyrkúıekte Munaıly aýdanynyń «№8 jalpy bilim beretin mektep» KMM-niń 466 oqýshysy dene qyzýynyń kóterilýi, ishtiń ótýi, qusý, álsizdik sııaqty belgileri bar oblystyń medıtsınalyq mekemelerine júgingenin esterińizge sala keteıik.
Onyń 98-i emdeýge jatqyzyldy, onyń ishinde eki bala qarqyndy terapııa bólimshesinde emdeldi.
«Ýaqtyly jáne bilikti medıtsınalyq kómek pen barlyq jaýapty organdardy naqty úılestirýdiń arqasynda Mańǵystaýdaǵy jaǵdaı tolyǵymen turaqtandyryldy jáne balalardyń densaýlyq jaǵdaıy alańdaýshylyq týǵyzbaıdy»,-delingen habarlamada.
