Mańǵystaýda Ybyqty saıda jartasqa jazý jazǵan er adam ustaldy
AQTAÝ. KAZINFORM – Mańǵystaýdaǵy Ybyqty saı shatqalynda jartastyń betine jazý jazǵan er adam vıdeoǵa túsip qaldy. Keıin polıtsııa kúdiktini ustady.
Áleýmettik jelide taraǵan kadrlardan er adamnyń jartasty belgisiz zatpen qashap, oǵan jazý jazǵanyn kórýge bolady. Vıdeo kópshilik arasynda narazylyq týdyrdy. Jeli qoldanýshylary tabıǵı nysandardy búldirýge jol bermeý kerektigin aıtyp, er adamnyń jaýapqa tartylýyn surady.
- Esimin jazǵysy kelse, nege óz kólikterine taspen jazbaıdy? - dep pikir bildirdi turǵyndardyń biri.
Keıbir qoldanýshylar mundaı áreket úshin jaýapkershilik qarastyrylýy kerek ekenin jazsa, endi biri oqıǵaǵa kýá bolǵan adamdardyń er adamdy toqtatpaǵanyna narazylyq bildirdi.
Mańǵystaý oblystyq polıtsııa departamentiniń málimetinshe, áleýmettik jelilerge júrgizilgen monıtorıng barysynda «Ybyqty saı» tabıǵı nysany aýmaǵynda vandalızm faktisi anyqtalǵan.
- Osy derek boıynsha qylmystyq is qozǵaldy. 34 jastaǵy kúdikti ustaldy. Tergeý jalǵasyp jatyr, - dep habarlady polıtsııa.
Vedomstvo tabıǵı nysandardy búldirýge jol berilmeıtinin eskertti. Mundaı árbir faktige quqyqtyq baǵa berilip, kináliler zańǵa sáıkes jaýapkershilikke tartylatynyn málimdedi.
Buǵan deıin de, Mańǵystaýda Ybyqty saıda vandalızm deregimen qylmystyq is qozǵalyp, turǵyn 25 táýlikke qamalǵan bolatyn.
