Mańǵystaýda esirtki ósirýge arnalǵan zerthana anyqtaldy
AQTAÝ. KAZINFORM — Mańǵystaý oblysynda «Quqyqtyq tártip» jedel-profılaktıkalyq is-sharasy barysynda esirtki ósirýge qatysty derek anyqtaldy.
Oblystyq Polıtsııa departamentiniń málimetinshe, 2026 jylǵy 28 sáýirde Munaıly aýdanyndaǵy eldi mekenderdiń birinde ornalasqan jeke turǵyn úıge tekserý júrgizý kezinde eki azamat ustalǵan. Olar aýlada esirtki zatyna uqsas ósimdikterdi joıý áreketi kezinde qolǵa túsken.
- Tekserý barysynda jedel-tergeý toby atalǵan mekenjaıǵa tintý júrgizip, aýlada ornalasqan sharýashylyq qurylysynyń ishinen esirtki ósirýge arnalǵan arnaıy jabdyqtalǵan zerthanany anyqtaǵan. Oqıǵa ornynan fıtolampalar, sý súzgileri, suıyq tyńaıtqyshtar, elektr generatorlary jáne qarasora ósimdigi tabylyp, tárkilendi, - delingen habarlamada.
Sonymen qatar taǵy bir sharýashylyq qurylysynan folgaǵa oralǵan marıhýanaǵa uqsas 15 túıinshek, elektrondy tarazy, esirtkini qoldanýǵa arnalǵan quraldar men noýtbýk tabylǵan. Úı aýmaǵynan qosymsha ósirilgen ósimdikter de anyqtaldy.
- Saraptama qorytyndysyna sáıkes, tárkilengen zattardyń jalpy salmaǵy 30 keli 840 gramm marıhýana ekeni belgili boldy. Atalǵan derek boıynsha qylmystyq is Qazaqstan Respýblıkasy Qylmystyq kodeksiniń 297-baby 3-bóligi jáne 300-baby 1-bóligi boıynsha tirkeldi. Qazirgi ýaqytta tergeý amaldary júrgizilip jatyr, - delingen habarlamada.
Buǵan deıin, Aqtaý teńiz portynyń burynǵy basshysy sot zalynan bostandyqqa shyqqany týraly jazǵan edik.
