Mańǵystaýda erli-zaıypty 3 mln teńge bopsalaǵany úshin sottaldy
ASTANA. KAZINFORM – Mańǵystaý oblysynda erli-zaıypty ıntımdik qyzmet kórsetetin adamnyń klıentteri týraly málimetterdi paıdalanyp, olardan 3 mln teńge bopsalaǵany úshin sottaldy. Sot úkimimen áıelge 4 jyl 6 aı, al er adamǵa 4 jyl bas bostandyǵynan aıyrý jazasy taǵaıyndaldy.
Mańǵystaý oblystyq prokýratýrasy baspasóz qyzmetiniń habarlaýynsha, sottyń 2026 jylǵy 25 qyrkúıektegi úkimimen R. jáne A. Qylmystyq kodekstiń 194-baby («Qorqytyp alý») boıynsha kináli dep tanyldy.
Sot anyqtaǵandaı, sottalǵandar kúsh qoldanatynyn aıtyp qorqytyp, bopsalaý arqyly ıntımdik qyzmet kórsetetin adamnyń klıentteri týraly málimetterdi ıemdengen. Keıin ózderin quqyq qorǵaý organdarynyń qyzmetkerleri retinde tanystyryp, jábirlenýshilerden 3 mln teńge talap etken.
Sot talqylaýy kezinde memlekettik aıyptaýshy sottalýshylardyń kinásin rastaıtyn dálelder usyndy. Sot olardy aıyptaý úkimin shyǵarýǵa jetkilikti dep tanydy.
Sot A.-ǵa 4 jyl 6 aıǵa bas bostandyǵynan aıyrý jazasyn taǵaıyndady. Al R. 4 jylǵa sottalyp, jazany óteý merzimi bir jylǵa keıinge qaldyryldy.
Úkim ázirge zańdy kúshine engen joq.
Mańǵystaý oblysynyń prokýratýrasy qorqytý nemese aqsha talap etý jaǵdaılaryna tap bolǵan azamattardy dereý «102» nómirine habarlasýǵa shaqyrdy.
Osyǵan deıin BQO sotynda bopsalaýmen aınalysqan uıymdasqan toptyń isi qaralyp jatqany týraly jazdyq.
