Mańǵystaýda erekshe balalar emge kezegin jyldap kútip júr
AQTAÝ. KAZINFORM — Mańǵystaýda múmkindigi shekteýli balalar em-dom ala almaı júr. Ata-analar naýqas balalaryn respýblıkalyq ońaltý ortalyqtaryna aparý úshin, kvotany keminde 3 jyl kútýge májbúr. Sondyqtan densaýlyq saqtaý basqarmasy kvota sanyn arttyrýdy surap, resmı hat jazǵan. Alaıda, jaýap joq.
Jalǵyzbasty ana Sandýǵash Shortanova «Aýtızm» dıagnozy qoıylǵan ulyn emdetemin dep talaı tabaldyryqty tozdyrǵan. Respýblıkalyq ońaltý ortalyqtaryna beriletin kvotany balasy 6 jasqa tolǵanda alǵash ret alyp, emge barǵanyn aıtady. Sodan keıin kezek jyljymapty. Qazir uly - 10 jasta.
- Balamdy 2 jasynda kezekke qoıdym. 6 jasqa shyqqanda kezegi kelip, ońaltý ortalyǵyna baryp qaıttyq. Qazir balamnyń jasy onda, 4 jyldan beri áli kezek kútip otyrmyz. Bizden de jaǵdaıy nashar otbasylar bar, tipti 3-4 balasy birdeı aýtıst januıalar bar. Olar qaıtpek? - deıdi Aqtaý qalasynyń turǵyny Sandýǵash Shortanova.
Oblystyq densaýlyq saqtaý basqarmasy balalarǵa joǵarǵy mamandandyrylǵan medıtsınalyq kómekti uıymdastyrý mamany Dámeli Moldashevanyń málimetinshe, aımaqta múgedektikpen esepte turǵan balalarǵa tek eki respýblıkalyq ortalyqqa ǵana joldama beriledi. Astanadaǵy ulttyq balalardy ońaltý ortalyǵy jylyna óńirge 200 oryn bólse, Almatydaǵy «Balbulaq» ortalyǵy 56 oryn bólip otyr.
- Oblys boıynsha júıke júıesi patologııasy bar, ońaltý jáne qalpyna keltire emdelýge yntaly, respýblıkalyq ortalyqtarda emdelýge ruqsaty bar kezekke tirkelgen naýqastyń jalpy sany - 1627, onyń ishinde «Balalar aýtızmi» dıagnozymen kezekke tirkelgen bala sany- 286. Bizge bólinetin kvota sany tym mardymsyz. Bizdiń tarapymyzdan oryn sanyn kóbeıtý jóninde ortalyqqa resmı hat jazyldy. Ásirese osy Mańǵystaý oblysyna óte az oryn bólinip otyr. Sol boıynsha resmı hat jazyldy biraq ol hatqa eshqandaı jaýap kelgen joq, - deıdi blystyq densaýlyq saqtaý basqarmasy balalarǵa joǵarǵy mamandandyrylǵan medıtsınalyq kómekti uıymdastyrý mamany Dámeli Moldasheva.
Buǵan deıin, Oljas Bektenov aýtızmi bar balalardy tárbıelep otyrǵan otbasylardy qoldaý kerektigin aıtqan bolatyn.
