Mańǵystaýda er adam óz-ózin órtemek boldy

AQTAÝ. KAZINFORM – Oqıǵa Beıneý aýdanynda bolǵan. Er adam Beıneý aýlyndaǵy polıtsııa bóliminiń baqylaý - ótkizý pýnktinde óz-ózin órteýge áreket jasaǵan.

Oblystyq polıtsııa departamentiniń habarlaýynsha, tártip saqshylary patrýldik baqylaý kezinde jol erejesin buzǵan kólikti toqtatyp, júrgizýshini ákimshilik jaýapkershilikke tartqan. Alaıda keıin kólik júrgizýshi polıtsııa bóliminiń baqylaý-ótkizý pýnktine ózi kelip, qyzmetkerlerdiń zańdy áreketine narazylyq bildirgen.

- Baqylaý pýnktinde ol ózine suıyqtyq quıyp, ózin-ózi órteýge tyrysty. Quqyq qorǵaý organy qyzmetkerleri bul áreketin ýaqytyly toqtatty. Er adam medıtsınalyq mekemege jetkizildi. Oqıǵa boıynsha qylmystyq is qozǵaldy. Sotqa deıingi tergeý júrgizilýde, oqıǵanyń barlyq mán - jaıy anyqtalyp jatyr, - delingen habarlamada.

Buǵan deıin, Mańǵystaý polıtsııasynyń bastyǵy týraly feık aqparat taraǵan bolatyn.