Mańǵystaýda er adam káýapqa qaqalyp, kóz jumdy
AQTAÝ. KAZINFORM — Qaıǵyly oqıǵa 10 mamyr kúni mektep ujymynyń tabıǵat aıasyndaǵy demalysy kezinde bolǵan. Er adam káýapqa qaqalyp, áriptesteriniń kóz aldynda kóz jumǵan. Polıtsııa bul derek boıynsha jan-jaqty tekserý júrgizilip jatqanyn habarlady.
Aqtaý qalasyndaǵy mektepterdiń biriniń qyzmetkerleri Mańǵystaý aýdanyndaǵy Jarmysh aýyly mańynda ornalasqan Aralbaı sarqyramasyna demalýǵa barǵan. Tabıǵat aıasyndaǵy dastarhan barysynda 56 jastaǵy er adam káýap súıegine qaqalyp, oqıǵa ornynda qaıtys bolǵan.
Mańǵystaý oblystyq Polıtsııa departamentiniń baspasóz qyzmeti atalǵan derek boıynsha tekserý jumystary bastalǵanyn málimdedi.
- Tergeýshiler jazataıym oqıǵanyń barlyq mán-jaıy men sebebin anyqtap jatyr. Quqyq qorǵaý organdary azamattardy tabıǵat aıasyndaǵy demalys kezinde barynsha saq bolýǵa shaqyrady, - delingen habarlamada.
Buǵan deıin, Mańǵystaýda tabıǵı nysandy búldirgen turǵyn 25 táýlikke qamalǵan bolatyn.
