Mańǵystaýda elektrondy baqylaýdaǵy sottalǵandar 150 retten astam zań buzǵan
AQTAÝ. KAZINFORM — Jyl basynan beri Mańǵystaý oblysynda elektrondyq baqylaýda júrgen sottalǵandar tarapynan 150-den astam quqyq buzýshylyq tirkeldi. Tártip buzǵandardyń biri 10 táýlikke ákimshilik qamaqqa alynsa, taǵy ekeýi sot sheshimimen bas bostandyǵynan aıyrý oryndaryna jiberildi.
Qazirgi ýaqytta Mańǵystaý oblysy boıynsha Qylmystyq-atqarý júıesi departamentiniń probatsııa qyzmetinde 900-den astam sottalǵan esepte tur. Olardyń bir bóligine sot belgilegen shekteýlerdiń saqtalýyn baqylaý úshin elektrondyq bilezikter taǵylǵan.
Bul qurylǵylar sottalǵandardyń júris-turysyn baqylaýǵa jáne belgilengen talaptardyń buzylýyn der kezinde anyqtaýǵa múmkindik beredi.
Probatsııa qyzmetiniń málimetinshe, jyl basynan beri 150-den astam quqyq buzýshylyq anyqtalǵan. Olardyń qatarynda belgilengen ýaqytta turǵylyqty jerinde bolmaý, tıisti ruqsatsyz belgilengen aýmaqtan shyǵý, ákimshilik quqyq buzýshylyq jasaý jáne elektrondyq bilezikterdi qasaqana búldirý faktileri bar.
Atap aıtqanda, sottalǵandardyń biri ákimshilik quqyq buzýshylyq jasaǵany úshin Aqtaý qalasy Polıtsııa basqarmasynyń arnaıy qabyldaý ornyna 10 táýlikke qamalǵan.
Sonymen qatar probatsııa qyzmeti taǵy eki sottalǵanǵa qatysty jazanyń ótelmegen bóligin bas bostandyǵynan aıyrý jazasyna aýystyrý týraly sotqa usynys engizgen. Sot usynystardy qanaǵattandyryp, atalǵan azamattar jazasynyń qalǵan bóligin óteý úshin qylmystyq-atqarý júıesi mekemelerine jiberilgen.
Buǵan deıin probatsııa esebindegi qyzylordalyq sot zalynan qamaýǵa alynǵany aıtyldy.
