Mańǵystaýda eldegi ekinshi biregeı jedel járdem stantsııasy ashyldy
AQTAÝ. KAZINFORM – 13 aqpanda Aqtaý qalasynda Mańǵystaý oblystyq jedel jáne shuǵyl medıtsınalyq járdem stantsııasynyń jańa ǵımaraty paıdalanýǵa berildi. Jylyna 100 myń shaqyrtýǵa qyzmet kórsete alatyn zamanaýı nysannyń ashylý saltanatyna oblys ákimi Nurdáýlet Qılybaı qatysty.
Saltanatty sharaǵa QR Bas prokýrorynyń orynbasary Ǵabıt Sadyrbekov, QR Densaýlyq saqtaý vıtse-mınıstri Tımýr Muratov, memlekettik organdardyń ókilderi, medıtsına salasynyń ardagerleri men óńir dárigerleri qatysty.
Oblys ákimi jańa nysannyń óńir úshin mańyzdylyǵyn atap ótti.
– Áleýmettik nysan Memleket basshysy Qasym-Jomart Toqaevtyń tapsyrmasyna sáıkes, Bas prokýratýra qaıtarǵan aktıvter esebinen jáne Densaýlyq saqtaý mınıstrliginiń qoldaýymen salyndy. Bul – Mańǵystaý jurtshylyǵy úshin úlken qýanysh. Jańa ǵımarat jedel medıtsınalyq kómektiń qoljetimdiligin arttyryp, turǵyndarǵa sapaly ári ýaqtyly qyzmet kórsetýge múmkindik beredi. Aq halatty jandardyń qajyrly eńbegi árdaıym qurmetke laıyq. Jańa nysan sizderdiń jumystaryńyzdy jeńildetip, kásibı múmkindikterińizdi keńeıtedi dep senemin, – dedi Nurdáýlet Qılybaı.
Zamanaýı stantsııa ortalyqtandyrylǵan birikken dıspetcherlik qyzmetpen, sımýlıatsııalyq jáne oqý-praktıkalyq ortalyqpen jabdyqtalǵan. Sondaı-aq 20 sanıtarlyq avtokólikke arnalǵan jyly garaj qarastyrylǵan.
2025 jyly oblys ákimdiginiń qoldaýymen jedel medıtsınalyq járdem stantsııasyna zamanaýı medıtsınalyq jabdyqtarmen qamtylǵan 32 sanıtarlyq avtokólik satyp alynǵan. Budan bólek «NCOC» kompanııasynyń demeýshilik qoldaýy aıasynda qosymsha 20 sanıtarlyq avtokólik alynǵan. Bul sharalar óńir turǵyndaryna kórsetiletin medıtsınalyq kómektiń qoljetimdiligi men sapasyn arttyrýǵa baǵyttalǵan.
Aıta keteıik, bul nysan biregeıligi jaǵynan Astana qalasynan keıingi ekinshi stantsııa sanalady. Aldaǵy ýaqytta elimizdiń barlyq óńirinde osyndaı úlgidegi medıtsınalyq mekemeler salý josparlanyp otyr. Nysannyń basty ereksheligi – dárigerlerdiń sapaly jumys isteýi úshin qajetti barlyq jaǵdaıdyń jasalýy.