Mańǵystaýda Ekinshi dúnıejúzilik soǵysqa qatysqan eki ardager bar
AQTAÝ. KAZINFORM – Onyń biri Vasılıı Salazkın bıyl 98 jasta, al Olga Zarıvnıak 93 te.
Vasılıı Salazkın 18 jasynda óz erkimen áskerge alynyp, birinshi Qıyr Shyǵys maıdanynda japon basqynshylarymen jaıaý ásker qatarynda shaıqasqan. Soǵysta kishi serjant shenine deıin kóterilgen. Erligi úshin «II dárejeli Otan soǵysy», «Qyzyl Juldyz» ordenderimen marapattalǵan. Ol maıdannyń aýyrtpalyǵyna qaramastan, soǵystan keıin el ıgiligine qyzmet etti. Qazirgi Túrkistan oblysynda aýyl sharýashylyǵy salasynda kólik júrgizýshi bolyp jumys istedi. Al, zeınetke shyqqasyn Mańǵystaýda turatyn qyzynyń qolyna kóship kelgen.
-1945 jyly soǵys aıaqtalsa da, birinshi Qıyr Shyǵys maıdanynda 3-4 aı boıy atys toqtaǵan joq. Japon basqynshylarynyń jekelegen bólimderi bizge ońaılyqpen berilmedi. Kóptegen qarýlas joldasym opat boldy. Biz kórgen surapyl jyldardy búgingi urpaq kórmesin deımin. Elde máńgilik beıbitshilik ornasyn, - deıdi soǵys ardageri Vasılıı Salazkın.
Al ekinshi maıdanger - Olga Zarıvnıak soǵys bastalǵanda nebári 13 jasta bolǵan. Soǵan qaramastan ol Brest oblysy Kleşelı qalasynda shoǵyrlanǵan partızan jasaǵyna baılanysshy retinde qosylǵan. Qaısar qyz armııa shtabyna mańyzdy aqparat jiberýmen qatar, jaraly jaýyngerlerge medıtsınalyq kómek kórsetken. Olga Zarıvnıak soǵystan keıin toqyma isimen aınalysty. Kúni búginge deıin kıim-keshek toqyp, tabys tabady.
- Ústi-basy las, kir-qojalaq kishkentaı qyzǵa jaý nazar aýdarmaıtyn. Maǵan sonyń úlken paıdasy tıdi. Partızandar qandaı qıyn tapsyrma berse de, buljytpaı oryndap júrdim. Kóshede kórgen-bilgenimdi jasyryn páterge kelgen baılanysshyǵa aıtyp, tehnıka, ásker turǵan jerlerdi kartaǵa túsirip beretinmin, - deıdi ardager.
Aıta keteıik, Ekinshi dúnıejúzilik soǵysqa Mańǵystaýdan 4942 adam attanyp, teń jartysy elge qaıtyp oralmaǵan. Qazir óńirde 2 maıdanger men 400-den astam tyl eńbekkeri turady.
Buǵan deıin, elde Ekinshi dúnıejúzilik soǵys ardagerine qandaı kómekter beriletini týraly jazǵan bolatynbyz