Mańǵystaýda eki jasóspirim mektep oqýshysyn soqqyǵa jyǵyp, vıdeoǵa túsirgen
AQTAÝ. KAZINFORM — Mańǵystaý oblysynda eki jasóspirim mektep oqýshysyn aıaýsyz soqqyǵa jyǵyp, bolǵan oqıǵany uıaly telefonǵa túsirgen. Oqıǵaǵa baılanysty qylmystyq is qozǵaldy.
Jábirlenýshiniń ápkesiniń aıtýynsha, inisi tańerteń dúkenge shyqqan kezde ony 16-17 jastaǵy eki jasóspirim kútip turǵan. Olar mektep oqýshysyn tanysyna qońyraý shalyp, syrtqa shaqyrýǵa májbúrlegen. Alaıda shaqyrylǵan jasóspirim syrtqa shyǵýdan bas tartqan soń, kúdiktiler balany soqqyǵa jyǵyp, áreketterin beınejazbaǵa túsirgen.
Osy jaǵdaıdan keıin jábirlenýshi aýrýhanaǵa jetkizilgen. Oblystyq densaýlyq saqtaý basqarmasynyń málimetinshe, bala jabyq bas-mı jaraqatyn alǵan.
— 2026 jylǵy 4 tamyzda 14 jastaǵy jasóspirim basynan jaraqat alyp, oblystyq balalar aýrýhanasyna jetkizildi. Tekserý nátıjesinde oǵan jabyq bas-mı jaraqaty, bas mıynyń shaıqalýy, sondaı-aq bet aımaǵynyń teriasty gematomalary dıagnozy qoıylyp, neırohırýrgııalyq bólimshege jatqyzyldy. Naýqasqa qajetti dıagnostıkalyq tekserýler tolyq júrgizildi. Bas mıynyń kompıýterlik tomografııasynda (KT) mı tarapynan organıkalyq zaqymdaný anyqtalǵan joq. Qazirgi ýaqytta naýqasqa tıisti em kórsetilip, dárigerlerdiń turaqty baqylaýynda, — delingen habarlamada.
Mańǵystaý oblystyq polıtsııa departamenti atalǵan derek boıynsha adamdar toby jasaǵan buzaqylyq faktisimen qylmystyq is qozǵalǵanyn habarlady.
— Oqıǵaǵa qatysýshylardyń barlyǵy anyqtalyp, zańdy ókilderimen birge polıtsııa bólimshesine jetkizildi. Qazirgi ýaqytta qajetti tergeý áreketteri júrgizilip jatyr. Kámeletke tolmaǵandardy tárbıeleý jónindegi mindetterin tıisinshe oryndamaǵany úshin olardyń zańdy ókilderi qoldanystaǵy zańnamaǵa sáıkes jaýapkershilikke tartyldy. Sondaı-aq materıaldar kámeletke tolmaǵandardyń isteri jónindegi komıssııaǵa joldandy, — dep habarlady vedomstvodan.
Polıtsııanyń málimetinshe, adamdar toby jasaǵan buzaqylyq Qazaqstan Respýblıkasynyń zańnamasyna sáıkes aýyr qylmys sanatyna jatady jáne ol úshin qylmystyq jaýapkershilik kózdelgen.
Buǵan deıin, Aqtaýda qyzǵa zorlyq kórsetemin dep qorqytqan er adam 30 táýlikke qamaldy.
