Mańǵystaýda Djekı Chan qatysatyn fılmniń túsirilimi bastaldy
ASTANA.KAZINFORM - Mańǵystaýda halyqaralyq «Armour of God: Ultimatum» fılminiń túsirilimi bastaldy Mańǵystaý oblysynda halyqaralyq «Armour of God: Ultimatum» kórkem fılminiń túsirilimine resmı túrde start berildi. Álemge áıgili akter Djekı Chan qatysyp jatqan jobanyń maqsaty – Qazaqstannyń tabıǵı kórikti jerlerine álemdik aýdıtorııanyń nazaryn aýdarý.
Bul – Qazaqstan kınoındýstrııasy úshin tarıhı mańyzy zor joba ári elimizdiń álemdik kınematografııadaǵy bedelin arttyratyn mańyzdy oqıǵa.
Jobanyń bastalýyna arnalǵan saltanatty rásimde fılmniń rejısseri Robert Kýn men álemge áıgili akter Djekı Chan kınematografııadaǵy qalyptasqan dástúrge sáıkes arnaıy kınotarelkany syndyryp, jańa týyndynyń túsirilim jumystaryna resmı túrde jol ashty.
Mańǵystaý oblysy ákimdigi baspasóz qyzmetiniń málimetinshe, fılmniń negizgi kórinisteri Mańǵystaý óńiriniń biregeı tabıǵı nysandarynyń biri – Bozjyra shatqalynda túsiriledi.
Halyqaralyq shyǵarmashylyq top aýqymdy túsirilim jumystaryn júrgizip, Qazaqstannyń tabıǵı áleýetin álemdik aýdıtorııaǵa tanytatyn jańa kınotýyndyny ómirge ákelmek.
Bul joba otandyq kınoındýstrııanyń damýyna jańa serpin berip qana qoımaı, Qazaqstandy halyqaralyq kınojobalardy júzege asyrýǵa qolaıly alań retinde tanytýǵa jáne ulttyq kıno óndirisiniń álemdik deńgeıdegi yqpaldastyǵyn kúsheıtýge múmkindik beredi.
Aty ańyzǵa aınalǵan akter Djekı Chan Mańǵystaý óńirine barǵanyn jazǵan bolatynbyz.
Aıda Balaeva Djekı Chandy Qazaqstandaǵy túsirilimniń bastalýymen quttyqtady.
