Mańǵystaýda dızel otynyn shekaradan zańsyz ótkizbek bolǵan shetel azamaty jaýapqa tartyldy
AQTAÝ. KAZINFORM — Mańǵystaý oblysynyń Beıneý aýdanynda Qazaqstannyń kedendik shekarasy arqyly dızel otynyn zańsyz alyp ótpek bolǵan shetel azamaty ákimshilik jaýapkershilikke tartyldy.
Beıneý aýdandyq sotynyń málimetinshe, oqıǵa 2026 jylǵy 9 shildede «Tájen» keden beketinde bolǵan. Qazaqstannan Ózbekstanǵa baǵyt alǵan shetel azamaty kóliktiń zaýyttyq qurylymynda qarastyrylmaǵan, syıymdylyǵy 95 lıtr bolatyn qosymsha janarmaı bagyna dızel otynyn quıyp, shekaradan alyp ótpek bolǵan.
Qazaqstan zańnamasyna sáıkes, munaı ónimderin avtomobıl jáne temirjol kóligimen el aýmaǵynan shyǵarýǵa tyıym salynǵan. Kólik quralymen memlekettik shekarany tek zaýytta ornatylǵan shtattyq janarmaı bagyndaǵy otynmen ǵana kesip ótýge ruqsat etiledi.
Sotta shetel azamatyna Qazaqstan Respýblıkasy Ákimshilik quqyq buzýshylyq týraly kodeksiniń 545-baby boıynsha (Eýrazııalyq ekonomıkalyq odaqtyń kedendik shekarasy arqyly taýarlar men kólik quraldaryn ótkizý kezinde tyıymdar men shekteýlerdi qoldaný tártibin saqtamaý) aıyp taǵyldy.
Sot qaýlysymen quqyq buzýshy kináli dep tanylyp, oǵan 15 aılyq eseptik kórsetkish (64 875 teńge) mólsherinde aıyppul salyndy. Sondaı-aq dızel otyny tárkilendi.
Shekara qyzmetiniń dereginshe, bıylǵy 1-21 shilde aralyǵynda ótkizý pýnktterinde janar-jaǵarmaı materıaldaryn zańsyz alyp ótýge qatysty 1342 áreket anyqtalǵan. Zańsyz tasymaldanbaq bolǵan janar-jaǵarmaıdyń jalpy kólemi 112 tonnadan asqan.
Buǵan deıin, Aqtaýda qaıyqtyń aýdarylýyna kináliler jaýapqa tartyldy.
