Mańǵystaý oblysynyń turǵyndary elektr jaryǵyn deldalsyz paıdalanatyn boldy

AQTAÝ. KAZINFORM – Budan bylaı tutynýshylarmen Mańǵystaý óńirlik elektr jelileri kompanııasy tikeleı jumys isteıdi. 

Bul energııamen jabdyqtaýshy jáne energııa berýshi uıymdar arasyndaǵy operatsııalyq shyǵystardy qysqartady.

Sondaı-aq, endigi jerde barlyq másele bir uıym arqyly sheshilmek. Mamandar bul ózgerister tarıf qunyna áser etpeıtinin aıtady.

- Tarıf ózgermeıdi. Bul ózgerister tutynýshylarǵa áser etpeıdi. Olar elektr energııasyn alýdy jalǵastyra beredi. Barlyǵyn tutynýshylardyń yńǵaıyna qaraı jasadyq. Halyq úshin ózgeris engizbeýge tyrystyq, - deıdi Mańǵystaý óńirlik elektr jelileri kompanııasynyń basshysy Qasymhan Syzdyqov. 

Mamandardyń aıtýynsha, turǵyndar tólemderdi mobıldi qosymsha arqyly tóleı beredi.

Al turmystyq emes tutynýshylar qaıta shart jasaýy tıis. Jumysy toqtaǵan mekemeniń jumysshylary Mańǵystaý óńirlik elektr jelileri kompanııasyna jumysqa ornalasatyn bolady. 

Buǵan deıin, Elimizde elektr jaryǵynyń shekti tarıfi ózgerýi múmkin ekenin jazǵan bolatynbyz.