Mańǵystaýda dalaly alqap erekshe kúıge endi
AQTAÝ. KAZINFORM - Mańǵystaý oblysyndaǵy «Manashy» memlekettik tabıǵı qaýmalynda bıyl ósimdik ataýly jyldaǵydan mol shyǵyp, alqap erekshe kúıge endi.
Uzaq jyldardan keıin qaýlaı ósken shóp dalanyń sánin kirgize túsken. «Qyzylsaı» memlekettik óńirlik tabıǵı parkiniń basshysy Myńbergen Qarataýov bul qubylysty jaqsylyqqa balap otyr.
«Qaýmal sońǵy ret 2016-2017 jyldary osyndaı kúıge engen edi. Odan keıingi jyldary shóp jaqsy shyqpady. Dala taqyr bolmasa da asa bıik kóterilmeıtin. Negizinen qaı ýaqytta da Ústirt jazyǵynda shóp bolady. Biraq bıylǵy kórinis barshamyzdy qýantyp otyr. Beıneý aýdanyndaǵy 5-shi razezd ben Seısem ata qorymy aralyǵynda qazir qulpyryp tur. Manashynyń budan arǵy aýmaqtaryndaǵy kórinis basqasha», — deıdi Myńbergen Qarataýov.
Inspektorlar qaýmalda ósimdik ataýly gúldep, jazyq daladanyń topyraǵyn kórsetpesteı ósýin ylǵaldyń mol túsýinen dep otyr.
Qazir «Qyzylsaı» memlekettik óńirlik tabıǵı parkiniń qyzmetkerleri ózderine qarasty jerlerdi turaqty qadaǵalap, ań-qustardy brokonerlerdiń atýyna tosqaýyl bolyp júr.
«Manashy» memlekettik tabıǵı qaýmaly 2015 jyly qurylǵan. Jer kólemi 172 573,2 gektar bolatyn bul jer oblysqa qarasty Mańǵystaý men Beıneý aýdandary aralyǵynda ornalasqan.
2021 jyly Mańǵystaý oblysy boıynsha qýańshylyq jaǵdaıy tirkeldi. Sol ýaqytta óńir sharýalary shyǵynǵa batyp, jaıylymnan tisteıtin shóp tappaǵan mal ataýly tegis qyrylǵan edi.
