Mańǵystaýda daladan tabylǵan 11 ıtbalyq teńizge jiberiledi

AQTAÝ. KAZINFORM – Mańǵystaý oblysy boıynsha balyq ınspektsııasy basqarmasy basshysynyń mindetin atqarýshy Qonarbaı Bazarbaevtyń habarlaýynsha, ınspektsııa qyzmetkerleri ıtbalyqtar anyqtalǵan aýmaqqa attanǵan. 

- Ken oryndarynyń ókilderi 11 ıtbalyq jınaǵan. Bizdiń mamandar qazir Qarajanbas ken ornyna jetti. Olar ıtbalyqtardy kólikke tıep, teńizge jiberý úshin Fort-Shevchenko jaǵalaýyna aparady, - deıdi Qonarbaı Bazarbaev.

Inspektsııa qyzmetkerleri ken oryndaryna jaqyn jaǵalaý áli de muzben jabylǵandyqtan ıtbalyqtardy ashyq sýǵa aparýdy sheshken. Sondaı-aq mamandar ıtbalyqtar tabylǵan ýchaskelerdi tekserip shyqpaq.

Buǵan deıin Mańǵystaýda ken oryndarynyń aýmaǵynan ıtbalyqtar tabylyp jatqany týraly jazǵan bolatynbyz.