Mańǵystaýda birneshe aýyldy jaılaǵan qaraqońyzdar karantındik emes bolyp shyqty

AQTAÝ. KAZINFORM — Beıneý aýdandyq fıtosanıtarııa bóliminiń basshysy Dastan Muhanovtyń aıtýynsha, zertteý júrgizilip, karantındik jándik emes ekendigi anyqtalǵan.

Qaraqońyzdyń ǵylymı ataýy — Tenebrionidae. Olardyń 15 000 ǵa jýyq túri bar. 

— Qaraqońyzdar adam úshin tikeleı qaýip tóndirmegenimen, olardyń jappaı taralýy estetıkalyq jáne sanıtarlyq turǵydan qolaısyzdyq týǵyzyp, turǵyndar arasynda alańdaýshylyq týdyryp otyr. Olardyń aıtýynsha, qońyzdar úılerdiń shatyryn, aýla men kóshelerdi jappaı jaýlaǵan. Qazirgi tańda mundaı jaǵdaı Beıneý aýylynan bólek, Boranqul, Aqjigit sııaqty basqa da eldi-mekenderde tirkeldi. Bul — tabıǵı klımattyq jaǵdaılardyń áserinen týyndaǵan qubylys, — deıdi Beıneý aýdandyq fıtosanıtarııa bóliminiń basshysy Dastan Muhanov. 

Mamannyń aıtýynsha, qaraqońyzdar — zııankes jándik. Sondyqtan jeke jáne zańdy tulǵalar zııandy organızmderdiń kóp damýy men taralýyna jol bermeýi qajet.

 — Árkim óz aýmaǵyn taza ustaýǵa mindetti. Kóshedegi qaraqońyzdardy joıý úshin Beıneý selosy ákimine sanıtarlyq sharalardy uıymdastyrý jóninde usynym hat jazyldy. Al, aýyl turǵyndaryna aıtatyn bolsaq, jekemenshik óz aýlalaryn, jer tilimderin taza ustaýy kerek. Qońyzdardyń damýy men taralýyna jol bermeý úshin, jeke turǵyndar ózderi sanıtarlyq sharalardy uıymdastyrǵany jón. Ol úshin dezınfektsııa jasaıtyn mekemelerge habarlasý kerek, — deıdi Dastan Muhanov.

Buǵan deıin, Mańǵystaý oblysy Beıneý aýdanynda qaraqońyz qaptap ketkeni týraly jazǵan bolatynbyz.