Mańǵystaýda brakonerlerdiń aýyna túsken óli ıtbalyqtar tabyldy

AQTAÝ. KAZINFORM – Qyzyl kitapqa engen ıtbalyqtardyń ólekseleri Qulaly araly aýmaǵyndaǵy teńizden shyǵarylǵan. Brakonerlerdiń zańsyz qoıǵan aýyna 7 ıtbalyq pen 4 bekire tuqymdas balyq túsken. 

Mańǵystaý oblystyq balyq ınspektsııasy basqarmasy Túpqaraǵan aýdandyq bóliminiń bas mamany Andreı Rýtskııdiń aıtýynsha, atalǵan aýmaqta «Bekire — 2025» aldyn-alý sharasy aıasynda reıdttik tekserý júrgizilgen. Nátıjesinde zańsyz aýlaý deregi anyqtaldy. 

— Reıdttik tekserý sáýirdiń 5-i kúni júrgizildi. Qulaly aralynan shamamen 2 shaqyrymdaı jerde ońtústik bóliginde, belgisiz adamdar qoıyp ketken bekire tuqymdas balyqtardy aýlaýǵa arnalǵan aý tabyldy. Ony sýdan alǵan kezde Qyzyl kitapqa engen 7 Kaspıı ıtbalyǵy men 4 bekire tuqymdas balyq shyqty. Olar jartylaı shirigen, - deıdi bas maman. 

Tárkilengen teńiz janýarlary men zattaı aıǵaqtar jaǵaǵa jetkizilip, Qyzyl kitapqa engen ıtbalyqtardyń ólimi boıynsha qylmystyq is qozǵaý úshin, quqyq qorǵaý organdaryna tapsyrylǵan. 

Buǵan deıin ıtbalyqtarǵa joǵarydan barlaý jumystary júrgizilgeni týraly jazǵan bolatyn edik.