Mańǵystaýda bir top jasóspirim qyzdy uryp, oqıǵany vıdeoǵa túsirgen
AQTAÝ. KAZINFORM — Mańǵystaý oblysynda kámeletke tolmaǵan qyzdy bir top jasóspirim uryp-soqqan. Oqıǵa sáti vıdeoǵa túsirilip, áleýmettik jelilerde taraǵan.
Beınejazbada qyzdyń tizerlep otyrǵany, keıin birneshe adamnyń ony uryp-soqqany kórinedi. Polıtsııa osy oqıǵaǵa qatysy bar barlyq balany anyqtap, ata-analarymen birge polıtsııa bólimine jetkizdi.
— Oqıǵanyń mán-jaıy jan-jaqty zerdelenip, qajetti materıaldar men túsiniktemeler jınaldy. Kámeletke tolmaǵandardyń ata-analary balalardy tárbıeleý jáne oqytý jónindegi mindetterin tıisinshe oryndamaǵany úshin jaýapkershilikke tartyldy, — dep habarlady Mańǵystaý oblysy Polıtsııa departamenti.
Polıtsııanyń málimetinshe, is materıaldary tıisti sheshim qabyldaý úshin sotqa jáne kámeletke tolmaǵandardyń isteri jónindegi komıssııaǵa joldanǵan. Al jasóspirimder profılaktıkalyq esepke qoıyldy.
Quqyq qorǵaý organdary jasóspirimdermen jáne olardyń otbasylarymen profılaktıkalyq jumystardy jalǵastyratynyn atap ótti.
Buǵan deıin, Jańaózende bopsalaý kúdigimen er adam qamaýǵa alyndy.
