Mańǵystaýda bir otbasynyń 3 adamy gazdan ýlanyp, qaza tapty
AQTAÝ. KAZINFORM – Qaıǵyly oqıǵa Munaıly aýdanynda boldy. Aýdandyq tótenshe jaǵdaılar bóliminiń málimetinshe, 4 adam gazdan ýlanyp qalǵan. Saldarynan 3 adam qaıtys boldy. Olar 30,16 jáne 13 jastaǵy bir otbasynyń balalary. Zardap sheken tórtinshi turǵynnyń jaǵdaıy aýyr. Ol balalardyń naǵashy apasy.

— 23-aqpanda Munaıly aýdany Atameken aýyldyq okrýgi Qalamqas turǵyn úı massıvinde 4 adamnyń gazdan ýlanǵany anyqtaldy. Oqıǵa ornynda 3 adam qaza tapqan. Bir adam aýyr jaǵdaıda Mańǵystaý oblystyq aýrýhanasynyń jansaqtaý bólimine jatqyzyldy. Munaıly aýdandyq polıtsııa bólimimen qylmystyq is qozǵalyp, tergeý áreketteri júrgizilip jatyr, — deıdi Munaıly aýdandyq tótenshe jaǵdaılar bóliminiń bastyǵy Nursultan Ábdirash.
Aldyn ala boljam boıynsha, gazdy qoldaný talaptary buzylǵan.
Buǵan deıin, Mańǵystaýda bir otbasynyń 5 adamy gazdan ýlanyp qalǵany týraly jazǵan bolatynbyz.